Riba e prome anochi di informacion di Dimas riba nan proyecto nobo di Dreamers, polis mester a intermedia pa calma e gran cantidad di hende cu a presenta.
Esaki ta e prome anochi cu e instancia ta organisa pa splica ki e rekisitonan ta y con e proceso ta cana pa muchanan y/of hobennan di edad mayor logra haya un permiso di residencia permanente.
Manera Bon Dia Aruba a trece como primicio un par di simannan pasa, ta cu tin hopi hoben cu ta pega den nan futuro, pasobra nan no tin un permiso of paspoort. Motibo ta cu mayornan no keda cla cu nan proceso pero hopi biaha tambe no sa cu ora nan yiu ta yega edad di mayor, cu e permiso di nan ta caduca. E hobennan aki mayoria biaha ta biba for di chikito na Aruba y nan ta sinti nan mes Arubano.
Bon Dia Aruba tambe a trece dilanti como unico medio cu segun Dimas tin entre 400 pa 1000 mucha indocumenta bayendo scol na Aruba.
Despues nos publicacionnan Dimas a anuncia cu lo bin cu e proyecto Dreamers pa asina duna oportunidad pa bin na remarca pa un permiso permanente (firma liber) pa e muchanan y/of hobennan adulto. Manera nos publica e siman aki e instancia ta organisa dos anochi informativo. Y nos a premira cu lo bay tin un interes grandi, asina nos a tende for di e comunidad.
Ayera nochi por a mira cu berdad hopi hende a presenta. E anochi di informacion a cuminsa 7or pero ya for di 5or por a mira un gran cantidad di persona wardando pafo di oficina di Dimas na Paardenbaai pa drenta.
Dado momento asina hopi hende a presenta cu e tension tabata halto, hasta cu pushamento. E situacion a bay for di man un rato cu a yama polis. Nan a bin cu varios unidad pa calma e situacion y pone tur hende den rij pa warda trankilo riba nan turno.
