Diasabra e boto El Patron a pega na candela ora di bay for di waf na Barcadera pa busca combustibel na Venezuela. Na mas o menos 3 miya zuid di Barcadera e boto a cuminsa huma y despues di un rato tabata full na candela.
E 3 tripulantenan abordo a bula na awa mesora. Tabatin un boto cerca cu a yuda di biaha pa saca e hendenan for di awa, segun informacion di polis. Niun hende a resulta herida. E causa di e candela no ta conoci.
Sinembargo polis ta bisa cu e negoshi di bay busca combustibel na Venezuela aki a bay ‘out of control’. “Pa dia tin mas di 8 boto ta bay Venezuela y bin bek den 2 ora cu e boto yena di gasolin y diesel. Asina nan yega Aruba, ta saca e boto y ta bende e combustibel Aruba caya cu publico. Algun boto ta hasta bay 2 of 3 biaha pa dia. Esaki ta di 3 biaha caba cu boto ta pega candela cu nos hendenan local cu ta practica e negoshi aki”, segun Cuerpo Policial.
Cuerpo Policial ta pidi pa henter e asunto aki haya mas atencion di e demas departamentonan concerni, pa cuminsa controla y regula e sistema aki. “Prome cu ta laat!”, segun polis
