Ayera tardi a traves di un comunicado di prensa, Cuerpo Policial di Aruba a duna un update tocante e caso di dos turista cu a muri na un hotel high rise algun dia atras.
Cuerpo Policial a identifica e dos persona como e homber B. Jozic naci 13-11-1990 na Bosnia, di nacionalidad Mericano, y e muhe C. Jozic, naci 13-11 1980 na Filipinas, tambe di nacionalidad Mericano.
Manera reporta anteriormente, diadomingo ultimo, polis a informa tocante un situacion na St.Regis Hotel unda un persona lo mester a cay di balcon y no ta duna señal di bida.
Central di Polis ta manda polis y como tambe ambulance na e sitio menciona. Na yegada di e unidad di polis en berdad nan ta topa un hende homber cu no ta duna señal di bida. Personal di ambulance no por a haci nada mas pa cu e persona. Ta trata di un turista hende homber nacionalidad Mericano.
Recherche, polis tecnico, dokter forensico y departamento di slachtofferhulp a presente na e sitio di e sucedido.
Investigacion haci ta indica cu e victima a bula for di e piso mas halto di e hotel y asina a bin na fayece.
Despues polis y personal di hotel a bay controla e camber di e victima y a bin encontra un dama cu tampoco ta duna señal di bida. Ta trata aki di e casa di e victima.
Un caso lamentabel y inusual y Cuerpo Policial Aruba ta manda palabra di condolencia na famia di e fayecidonan. E investigacion tocante e caso ta continua.
