Diabierna den careda di 3 or marduga tironan a cay den Heidestraat na e casnan di pueblo na Noord despues di un discucion formal segun yamada di habitantenan. Unidadnan policial di Noord, Oranjestad y Santa Cruz di biaha a presenta na e sitio mientras cu San Nicolas a keda riba un standby pa cualkier novedad debi cu e problema den e bario di Noord ta conoci pa ta uno peliger di manda un patruya so.
E biaha aki polis a confronta nan mes den un situacion caminda a mira e sospechoso cu arma di candela den man punta riba hende y a start un persecucion na pia pero e sospechoso cu tabatin e arma a huy. A rondona cas di e sospechoso pero e tata a sali pafo y comenta cu e yiu no t’ey pero a duna Polis permiso pa controla pero nada di e sospechoso. Dos persona a keda deteni den Duartestraat y un auto tuma den beslag.
Na Heidestraat polis a papia cu e victimanan y asina compronde kico a pasa y den un cura di cas a topa cu 4 huls mientras cu e personanan a scucha por lo menos 6 tiro. A bin haya un auto yena cu bala riba dje unda e caso aki a pasa otro caminda y recherche a laga tuma e vehiculo den beslag y un persona a keda deteni.
Recherche di Noord lo bay traha duro riba e situacion aki pa asina gara e toro na su cacho pa e problema di tiramento y gara esnan responsabel, ya cu e habitantenan no por biba trankil unda cu constant tin tiro ta cay.
