(Reuters) – Polonia a introduci control temporal riba su fronteranan cu Alemania y Lituania dialuna, den loke gobierno a bisa ta un paso pa controla migrantenan mas profundamente meymey di preocupacion publico pa cu inmigracion.
E decision a sigui medidanan di frontera similar durante e ultimo aña y mei di Hulanda, Belgica y Alemania.
Na Polonia, e debate riba migracion a bira cada bes mas controversial den e ultimo simannan, unda a mira gruponan di activista di ultra derecha lansa “patruya di ciudadano” na e frontera occidental.
Alemania tabatin control riba su frontera cu Polonia desde 2023, pero e aña aki a cambia pa un acercamento mas severo cu a pone cu el a rechasa migrantenan indocumenta, y tambe debolbe nan na Polonia bou di reglanan di EU y un acuerdo bilateral.
Warsaw ta bisa cu esey a lag’e enfrenta un peso extra inhusto.
E ta bisa tambe cu migrantenan na Belarus ta purbando di drenta EU a traves di Letonia y Lituania pasobra nan defensanan riba frontera ta relativamente mas zwak.
“Ta p’esey nos a introduci control na e frontera cu Lituania”, prome minister Donald Tusk a bisa dialuna. “Pa redirigi e fluho di hende aki, cu ta ser desvia pa nos barera, pero cu kier crusa Polonia atrobe a traves di e frontera cu Letonia y Lituania, y mas leu den Europa.”
Knut Abraham, e coordinador di Berlin pa relacionnan Aleman-Polaco, a bisa cu e controlnan por conduci na congestion y wanta mercancia, mientras cu tin tiki impacto real riba migracion.
Rafal Gronicz, e alcalde di e ciudad di frontera di Polonia di Zgorzelec, tambe a bisa cu e tabata preocupa pa e efecto riba trafico y dudoso si e controlnan tabata necesario.
“Tanten cu mi ta na bida, nunca mi no a conoce niun hende cu kier a huy for di Alemania pa Polonia,” el a bisa TOK FM. “Mi ta spera cu esaki lo cambia algun dia. Pa awor, e ta djis noticia falso. No tin olanan urgente di migrantenan ta cana rond di Zgorzelec.”
E gobierno centrista di Polonia ta bisa cu e cantidad di migrantenan cu a regresa Polonia for di Alemania tabata mas halto bou di e gobierno nacionalista anterior.
E ministerio di Asunto Interior y e guardia di frontera a bisa cu e controlnan lo no frena e trafico y cu nan a detene caba un ciudadano Estonio riba e frontera di Polonia cu Lituania pa transporta cuater migrante ilegal cu ta sospecha di ta Afgano.
E sentimento publico na Polonia pa cu migrantenan a bira fuerte desde cu un ciudadano Venezolano a ser acusa di a mata un dama di 24 aña den e ciudad di Torun na juni.
Diadomingo alrededor di 10.000 hende a tuma parti na un marcha organisa pa activistanan nacionalista conmemorando e.
Diasabra marduga un homber Polaco a fayece despues di a ser hinca durante un pelea na Nowe, noord di Polonia.
Polis a bisa dialuna cu nan a detene 13 persona relaciona cu e incidente – tres Polaco y 10 Colombiano.
E canal estatal di noticia TVP Info diadomingo a mustra un multitud rabia ta reuni den e localidad pafor di e hostel di trahadornan unda e Colombianonan tabata biba.
Activistanan di derecho humano a condena e “patruyanan di ciudadano”.
“E accionnan di e gruponan aki cu ta proclama nan mes ta e resultado di un narativo politico radicalizador cu ta presenta migracion como un menasa, cu ta alimenta miedo social y desconfiansa den institucionnan estatal,” Fundacion Helsinki pa Derecho Humano a bisa den un comunicado diabierna.
