Segun Caribbean Weather Center, tin por lo menos dos dia di stof di Sahara cu ta na caminda pa Caribe, entre otro pa Aruba tambe. Esaki lo ta entrante diabierna awo y lo keda posibelmente te cu diadomingo.
E fuente Caribbean Weather Center ta raporta cu e ola di stof aki lo ta mas significante/pisa cu esun ultimo cu a pasa. E fuente ta sigui bisa cu pa diadomingo tin un otro posibel ola tropical cu lo bin den direccion di islanan ABC, cual lo mester percura pa e stof aki bay for di nos area.
Bon Dia Aruba ta conseha tur persona pa tene cuenta cu esaki, principalmente si ta alergico na stof of si ta sufri di asma. E ta conoci cu e posibilidad pa haya un griep pisa despues di inhala e stof aki ta grandi. Purba di keda paden lo mas cu ta posibel y asina evita di inhala e stof aki.
