(AP) — Un hues federal a duna permiso diabierna na e Departamento di Husticia pa publica e transcripcionnan di un investigacion di gran hurado referente na e abuso di menornan di edad cometi pa Jeffrey Epstein na Florida—un caso cu na final no a resulta den ningun cargo federal contra e miyonario delincuente sexual.
Hues di Distrito Mericano Rodney Smith a bisa cu un ley federal recientemente aproba cu ta ordena e publicacion di documentonan relaciona cu Epstein ta surpasa e reglanan di siguridad di e gran hurado.
E ley firma den november pa presidente Mericano Donald Trump ta obliga e Departamento di Husticia, FBI y fiscalnan federal pa publica despues e luna aki un gran cantidad di material cu nan a acumula durante investigacionnan referente na Epstein cu ta data back na al menos dos decada.
E decision di corte diabierna tabata trata e investigacion federal mas prome cu ta conoci.
Den 2005, polis na Palm Beach, Florida, unda Epstein tabatin un mansion, a cuminsa tuma declaracion di muchanan adolescente cu tabata conta cu nan a ser contrata pa duna masashi sexualidad na e economista. FBI despues a uni na e investigacion.
Fiscalnan federal na Florida a prepara un acusacion den 2007, pero abogadonan di Epstein a ataca e credibilidad publicamente di e victimanan mientras cu den secreto nan tabata negociando un acuerdo di declaracion di culpabilidad cu lo permitie evita castigo serio di prison.
Den 2008, Epstein a declara su mes culpable pa cargonan estatal relaciona na solicitacion di prostitucion di un persona bao di 18 aña. El a sirbi gran parti di su sentencia di 18 luna den un programa di sali pa traha cu tabata permitie pasa su dianan den su oficina.
E fiscal Mericano na Miami e tempo ey, Alex Acosta, a acorda pa no persigui Epstein riba cargonan federal—un decision cu a causa indignacion entre e victimanan di Epstein. Despues cu Miami Herald a reexamina e acuerdo di declaracion di culpabilidad poco usual den un serie di reportahe den 2018, rabia publico riba e sentencia suave cu Epstein a haya a causa e renuncia di Acosta como secretario di labor bao administracion di Trump.
Un rapport di e Departamento di Husticia den 2020 a haya cu Acosta a usa “mal huicio” den maneho di e caso, pero tambe a conclui cu e no a participa den conducta profesional indebido.
Transcripcionnan di e proceduranan di e gran hurado di e caso federal bandona na Florida por duna mas claridad riba e motibonan di fiscalnan federal pa no sigui cu e caso. Documentonan relaciona cu e proceduranan di gran hurado estatal ya a ser publica.
E fecha riba cual e documentonan lo ser publica no ta conoci.
