(AP) – Ora cu Young Thug cuminsa su huicio mas durante e luna aki den acusacionnan relaciona cu gang, fiscalnan lo por usa letranan di su rap como evidencia den su contra, hues a declara diahuebs.
Fulton County Superior Court su hues hefe Ural Glanville a bisa den corte cu e lo permiti e fiscalnan introduci 17 set di letra cu nan a identifica si nan por demostra cu e letranan ta relaciona na crimennan cu e rapper y otronan ta acusa di a comete. E abogadonan di defensa a pidi hues exclui esaki, argumentando cu e letranan ta constitucionalmente expresion proteha y lo ta perhudicial di manera inhusto.
Young Thug, naci Jeffery Lamar Williams, a ser acusa formalmente aña pasa cu mas di 2 decena di otronan. Despues cu algun di e acusadonan a cuminsa drenta den acuerdonan y otronan a ser separa pa cuminsa huicio despues, argumentonan di apertura a ser stipula pa cuminsa dia 27 di november den e huicio contra Young Thug y 5 otro.
Fiscalnn a bisa cu Young Thug a co-funda e gang criminal y violento den aña 2012 yama Young Slime Life of YSL, cual ta acusa di ta asocia cu e gang nacional Bloods. Fiscalnan a bisa cu e rapper a haci uso di su musica y su publicacionnan riba rednan social pa promove e gang, cual aparentemente ta tras di varios crimen violento incluyendo asesinato, tiramento y robo di auto.
Artistanan den su compania di grabacion ta considera parti di Slime Family y un album “Slime Language 2” a yega posicion number 1 den april di ana 2021. El a skirbi tambe e hit “This Is America” cu Childish Gambino, cual a bira e prome cancion di HipHop cu a gana un Grammy den aña 2019.
Fiscalnan a usa Georgia su leynan di expansion di gang pa trece dilanti e acusacion formal. Tur e acusadonan a ser acusa di conspiracion pa viola e leynan, y e acusacion formal ta inclui e letranan di rap cu e fiscalnan ta acusa ta actonan encubierto cu ta “sigui e conspiracion.”
