Banco Central di Aruba (BCA) ta publica su “Operational Report 2024” y su “Condensed Financial Statements 2024” ayera. Cada aña, BCA ta publica su rapport operacional y e estado financiero condensa di e aña anterior, ofreciendo un bista valioso na “stakeholder”.

E rapportnan ta duna un sinopsis di e resultadonan financiero di BCA pa aña 2024 y ta elabora riba e desaroyonan y logronan principal relaciona cu cuater di su responsabilidadnan principal: esta maneho monetario, maneho di reserva, sistema di pago y consehero di Minister di Finanzas. Ademas, e rapport operacional aña 2024 ta refleha brevemente riba datonan di personal di BCA y ta destaca e actividadnan operacional y strategico principal pa aña 2024 y su enfoke pa aña 2025. Un resumen tambe ta wordo duna riba con BCA ta wordo dirigi y e forma cu riesgonan clave ta wordo maneha.

E di cinco responsabilidad principal di BCA, esta e supervision y regulacion di e sector financiero di Aruba, ta cubri den e rapport di Supervision di Sector Financiero (FSSR), cu a keda publica dia 23 di juli 2025 y ta disponibel riba e website di BCA.

Record di resultadonan halto te na e fecha aki

BCA a cera aña 2024 cu su resultado financiero netto di mas halto , yegando Afl. 70,4 miyon compara cu Afl. 23,9 miyon den aña 2023. E logro aki tabata principalmente impulsa door di un aumento di 138,6 porciento den entradanan di interes netto te na Afl. 80,9 miyon y a wordo empuha door di un entrada mas halto di e portofolio di inversion, despues di un aumento abrupto di Afl. 510,2 miyon di su inversionnan (den exterior) como tambe di un restructuracion strategico di e portofolio pa mehora rendimento y reduci riesgo di e tasa di interes na aña 2023 y aña 2024. E ganashinan aki a keda parcialmente compensa door di gastonan di interes mas halto riba depositonan di banco comercial. E balansa di BCA tambe a subi substancialmente, cu activonan total cu a subi cu 29,2 porciento na Afl. 3.490,3 miyon. E crecemento aki a wordo sostene door reserva di divisa mas halto, un aumento substancial den e balor di e reserva di oro reflehando prijsnan mas halto den mercado y nivelnan di deposito mas grandi. E capital y reservanan di BCA a crece cu 21,1 porciento te na Afl. 29,3 miyon na aña 2024, reflehando e aumento den ganashi no distribui.

Logronan operacional

Banda di un prestacion financiero fuerte na aña 2024, BCA a sigui maneha su gastonan efectivamente, cu gastonan di personal kedando como e categoria di gasto mas grandi, consistente cu aña 2023. Ademas, a logra progreso significante riba proyectonan strategico, manera publicacion di pronosticonan di BBD riba termino medio pa añanan 2023–2027, fortalece seguridad cibernetico y e revision di e strategia di continuidad di operacion y recuperacion den caso di calamidad.

Na aña 2024, BCA a sigui inverti den e desaroyo di talento di su empleadonan como tambe den participacion di personal y “stakeholder” pa medio di varios sesionnan informativo, reunionnan y conferencianan. Mescos cu añanan anterior, BCA tambe a duna bek na e comunidad di Aruba pa medio di participacion na diferente actividadnan social como tambe pa medio di donacionnan. BCA tambe a contribui ampliamente na desaroya reglanan di maneho pa medio di intercambio di conocemento, investigacion, publicacion y participacion activo na varios plataforma di “stakeholder” (internacional).

Perspectiva pa aña 2025

Aña 2024 tabata un aña importante pa BCA—no solamente pa loke ta e resultado financiero, pero tambe pa construi un institucion mas fuerte y resiliente pa futuro. BCA lo sigui adapta, innova y sirbi e comunidad di Aruba cu integridad y excelencia. Cu mira pa futuro, BCA lo mantene su enfoke riba ehecucion efectivo di proyectonan strategico. Pa e motibo aki, e lo prepara e di tres plan strategico pa añanan 2026–2030. Cu un fundeshi financiero solido, un vision strategico cla y un forsa laboral dedica, BCA ta bon posiciona pa sigui cumpli cu su mandato y sigui aporta na e stabilidad y resiliencia financiero di Aruba.