Post Aruba N.V. riba dia 28 di october a emiti e serie nobo di stampia cu e tema “Instrumentonan Musical 2016”, cual ta consisti di cinco stampia y un “envelop di prome dia di emision”. E artista local Rhona Lemminga a diseña e stampianan cu a wordo imprimi na Johan Enschede Security Print na Hulanda.
Post Aruba N.V. ta introduci e cinco stampianan balora na 100 cen, 140 cen, 205 cen, 220 cen y 500 cen. Tur cinco stampia ta costa hunto Afl. 11,65. E envelop di prome dia di emision tin un balor di Afl. 13,15. A produci un cantidad limita di e serie di stampia.
E coleccion su cinco diseñonan ta:
*100c-Bongo: Bongo ta un instrumento di origen Cubano cu ta consisti di dos tambor chikito di diferente tamaño. E tambunan ta pega banda di otro y nan bom ta habri. E tambor mas grandi ta hiba e nomber “embra” y e esun chikito ta wordo yama e “macho”. E cabesnan di e bongo ta traha di cuero di carne. Pa toca e bongo e tocado ta sinta cu e instrumento memey di su pianan. Bongo tin un zonido dominante y e tocado ta improvisa den e ritmo “son” na un manera mas agresivo tras di e resto di e grupo.
*140c- Raspa: E raspa ta un instrumento di percusion cu ta duna un zonido di kraakmento ora rasp’e cu un pida palo. Originalmente e tabata wordo traha cu un calbas largo, y e ta wordo uza den musica Latino Americano. Ta haci varios corta paralelo riba un calbas seco fofo na un banda di e calbas; ta uza un pida palo pa raspa e cortanan. E zonido ta mescos cu e zonido cu e colebra cascabel ta haci. E raspa ta relaciona cu e guiro of guayo Cubano y e raspa Dominicano, cual ta traha di metal.
*205c-Acordeon: E acordeon ta cay bao di e grupo di instrumentonan di aire y zonido pa via di e forma cu e ta produci zonido. A base di e forma cu e ta wordo toca e ta wordo categorisa como un instrumento di boton of tecla. Pa tok’e, e acordeonista ta habri of cera e instrumento mientras cu e ta primi e botonnan of teclanan. Esaki ta permiti e aire pa pasa banda di algun “lenga” den e cashi y e “lenganan” ta cuminsa vibra y ta produci e zonido. E acordeon ta wordo uza den musica tipo cajun, zydeco, y Jazz, como instrumento di solista y den orkestanan di musica clasico.
*220c-Marimba: E instrumento aki a origina na Africa Central, pero a desaroya y haya su propio identidad y nificacion. Su baranan ta traha di palo suave y nan ta mas smal cu e baranan di un xylofon, p’esey su timbre ta mas suave, mas profundo y mas rico. E ta forma parti di e seccion di percusion standard, y danki na su zonido agradabel el a logra a haya mas importancia cu e xylofon, y a bira virtuoso como un instrumento cu por wordo toca su so.
* 500c-Steelpan: E steelpan ta un instrument musical unico. E instrumento aki por produci cada nota musical y tur tipo di musica. E ta wordo asocial cu musica manera soca, calypso y carnival, pero por toca cualkier ritmo riba dje.
Leonard Turner, un inmigrante di Trinidad cu tabata traha na e refineria Lago a introduci steelpan nan Aruba. E prome steelbandnan di Aruba tabata yama “Shoo-Shoo Baby” y Aruba All Star Boys. E steelpan ta traha di e barinan di zeta cu tabata procede di Lago.
E popularidad di steelpan a crece masha y e prome compencia di steelband – cu algun banda yegando na un total di 40 musico, a wordo organisa na 1964. Ocho banda a competi e tempo ey, y Aruba Invaders funda pa Edgar Connor, a gana e competencia.
Connor ta ser conoci como e “gran panman di Aruba”. E tabata un experto den toca e instrumento, pero tambe den su produccion. El a dedica un parti grandi di su bida na traha, stem y promove e instrumento aki. Su yiunan ta sigui den su pasonan como musiconan specialisa den steelpan.
Steelband no tabata haci falta den paradanan di carnaval di añanan 1960 y 1970.
Den añanan 1990 e popularidad di steelpan y steelband a baha hopi y el a bira casi un arte perdi. Den hotelnan ainda e musica di steelpan ta hopi pidi y por topa tocadonan ainda activo na cierto eventonan cultural. Ainda tin un of dos grupo cu ta participa na paradanan di carnaval.
E serie di stampia “Instrumentonan Musical 2016” ta obtenibel na e diferente oficinanan di Post Aruba cu ta ubica na Oranjestad, San Nicolas, Sta. Cruz y Palm Beach Plaza Mall. Pa mas informacion tocante e stampianan aki por tuma contacto cu Departamento Filatelico di Post Aruba N.V., situa na J.E. Irausquinplein 9, Oranjestad, number di telefon 528-7678, of bishita e pagina di Facebook “Aruba Stamps”.
