Dia 4 di october 2022, Dia Mundial di Bestia, Post Aruba N.V. a emiti su serie di stampia titula ‘Stima bo cacho’.

E emision a keda realisa cu colaboracion di e Plan Nacional cu ta atende cu e problematica di cacho den cuadra di e “Ley di Cacho”, pa medio di un concurso di pintamento titula ‘Stima Bo Cacho’ cu a tuma luga na 2021. E idea di e concurso ta pa permiti e muchanan expresa nan mes y a la bes conscientisa nan tocante e importancia pa cuida nan mascota debidamente y siña nan tocante nos “Ley di Cacho”.

E comision di e Plan Nacional a propone cuater tema cu e muchanan por a pinta. Di e mas cu 1000 pintura cu a ricibi, a scoge un ganador di cada tema y su pintura a bira e diseño di un stampia.

E cuater tema y e ganadornan di e concurso di pintamento 2021“Stima Bo Cacho” cu a bira un stampia e aña aki ta:

  • “Baña bo cacho”: Nathan Kelly – klas 6 di St. Anna School*

Inspiracion: Semper Nathan tabata desea di tin su mesun cacho pa e por baña y cuida. Cu e concurso di pintamento aki el a siña con pa cuida un cacho mas miho. Awo e ta spera di por haya su mesun cacho pa asina e por haci su pintura bira realidad y demostra con hopi e ta stima y por cuida un cacho.

  • “Hunga cu bo cacho”: Angel Shurumay –  klas 4 di St. Anna School*

Inspiracion: Angel ta refleha su mes den su pintura, pasobra semper el a soña di tin un cacho cu e por cana y hunga cune, cuida y stima  y cu por compañ’e semper como su amigo fiel.

  • “Keiro cu bo cacho na cadena”: Evoleth Urdaneta Contreras – klas 5 di Maria School*

Inspiracion: Evoleth ta wak su mes ta cana liber cu su cacho den parke, disfrutando di e paisahe, naturalesa y un shelo blauw bunita.

  • “Bo cacho como parti di bo famia”: Marianne Casafus – klas 5 di Scol Primario Kudawecha*

Inspiracion: Marianne ta wak su cachonan como parti di su famia, semper ora cu e yega cas, nan ta sper’e contento y nan ta dun’e hopi amor.

* Klas cu tabata cursando den 2021, na momento cu a participa den e concurso di pintamento.

 

Post Aruba a uni su mes na e pensamento di e comision, cu si cuminsa inculca e respet pa nos Ley di Cacho y e amor pa mascota cerca nos muchanan, esey ta garantisa un miho futuro pa locual ta trata e cuido di mascota door di nan doñonan y un escogencia responsabel si ta tuma un mascota si of no.

E emision di stampia aki ta acompaña pa un Envelop Prome Dia di Emision cu a keda diseña pa Sr. Elvis Tromp. Nan ta obtenibel na Post Aruba na Oranjestad y San Nicolas y tambe riba e stampshop www.postaruba.com/stampshop

Pa mas informacion tocante e serie di stampia ‘Stima bo cacho’, bo por consulta e pagina di Facebook: Aruba Stamps of pagina web: postaruba.com/philatelic/