Un di e reunionnan anual di mas grandi di pueblonan indigena na Merca ta cuminsa awe na New Mexico, unda organizadonan di e powwow di dos dia ta bisa nan kier conscientisa tocante e asesinato y desaparicion di muhenan nativo.
Melonie Mathews, kende su famia a funda e Gathering of Nations Powwow, a bisa cu e organisadonan ta dedicando e Miss Indian World Pageant na muhenan indigena desapareci of asesina.
Nan situacion a bira enfoke durante e ultimo aña di legislacion federal y estatal, marcha y demostracionnan. Un campaña di conscientisacion nacional lo wordo promove riba un billboard cerca di e sitio di e powwow na Albuquerque. Varios legislado federal – incluyendo un di e prome muhe nativo elegi den congreso, rep. Deb Haaland di New Mexico, a bisa den un declaracion cu nan ta sostene e campaña.
Riba algun reserva, estudionan federal a mdemostra cu muhenan nativo ta wordo mata 10 biaha mas cu e averahe nacional. Miss Indian World Pageant ta spera di inclui 18 participante di tribunan na Merca y Canada, cu lo wordo husga riba nan discurso publico y presentacion cultural. Como 3mil cantante y bailarin, y 800 artesano lo participa den e powwow.
E powwow tin ‘un historia largo di resalta asuntonan di importancia pa pueblonan nativo di Nort America’, segun un vocero. Anteriormente a promove registracion di votado, problemanan hubenil, y prevencion di abuso di opioide entre su eventonan principal, cu ta inclui e dos- biaha pa dia entrada grandi di bailarin.
Organizadonan di powwow a bisa cu nan intento di trece mas conscientisacion tocante muhenan indigena asesina y desapareci tabatin potencial di alcansa e 10mil persona cu lo atende e powwow.
Ademas di curasha participantenan di Miss Indian World Pageant pa papia tocante e caso di e victimanan, organisadonan a planea un presentacion riba historia di e movemento pa combati e morto y desaparicion di muhenan nativo.
