Durante un conferencia di prensa ayera mainta lider di fraccion di PPA parlamentario Eduard Pieters a toca diferente topico di importancia. Un di e topiconan cu e parlamentario a trece dilanti ta tocante e mocion presenta pa miembro di Tweede Kamer Raoul White (GroenLinks-PvdA) cu ta beneficia studiantenan di e parti Caribense di Reino.

Parlamentario Piteres a splica cu recientemente parlamentario Carlois Bermudez (AVP) a tene un rueda di prensa y a trece dilanti e topico di “braingain”, despues cu el a sinta cu varios studiante mientras cu e tabata na Hulanda pa IPKO, pa yuda studiantenan bin back Aruba, percura pa nan por haya vivienda y trabou. Alabes Bermudez a indica cu e mocion cu parlamentario White a entrega ta uno hopi bon pa studiantenan.

E mocion di e miembro di Tweede Kamer ta pa e studiantenan di islanan CAS y islanan BES por haya un tipo di dispensacion di nan debe ora nan bay back nan isla dentro di un termino defini.

Parlamentario Pieters a splica cu fraccion di PPA ta apoya completamente e mocion entrega pa parlamentario White pasobra PPA tambe tin e punto aki den su plan Nos Aruba 2050 caminda cu e partido kier y ta desea pa mas hoben profesional cu caba d gradua por regresa Aruba pa hiba e comercio pa dilanti,

Sinembargo, parlamentario Pieters a indica, dia 28 di maart fraccion di PPA a entrega un mocion mara na presupuesto di pais Aruba caminda cu a urgi gobierno pa hiba combersacionnan cu DUO na Hulanda pa por haya un tipo di reduccion di interes, no dispensacion, pa studiantenan cu ta termina nan estudio exitosamente, y alabes crea e posibilidad di un periodo di gracia di cinco aña pa ora nan yega e isla back nan por instala nan mes y despues di e periodo di gracia aki cuminsa paga nan debe.

“E tabata un mocion mas agradable pa studiantenan, pero asina mes ta mira cu parlamentario Bermudez di AVP a vota contra e mocion aki, un mocion netamente pa yuda studiantenan na Aruba,” el a remarca.

Pieters a urgi pa parlamentario stop cu e politica di vota contra un mocion cu ta bon djis pasobra ta oposicion. “Ora cu bo ta haya algo bon, sea cu ta coalicion of oposicion ta presenta algo cu ta na bienestar di pueblo, bienestar general di pueblo, nos mester sa di vota pro esaki manera PPA a bin ta haci,” el a agrega.

El a enfatisa cu ta importante pa prome cu eleccion un partido bin cu un programa di campaña, un plan di kico ta e metanan cu nan kier logra, presenta esakinan y bisa pueblo cual ta e metanan cu ta bay traha riba dje.

El a menciona cu prome cu nan a bay campaña partido PPA, via plataforma Pais, a sinta cu un grupo di studiante cu tabata na Aruba pa wak kico tabata nan e necesidadnan cu nan tabatin y basa riba esey nan a traha nan plan Mi Aruba 2050.

“Nos a bay eleccion nos a haya un asiento y a drenta parlamento y p’esey nos ta usa nos instrumento huridico pa trece mocionnan pa urgi gobierno pa inclui esaki den nan plan di gobernacion. Pa nos sorpresa dia 28 di maart e pretexto cu tabatin tabata cu no tabatin un plan di gobernacion fiho ainda y no tabata sa con ta bay ehecuta esaki,” e parlamentario a menciona.

Pieters a splica cu den e plan Mi Aruba 2050 di partido PPA ta indica cu nan lo kier a papia cu DUO si nan tabata den gobernacion, pero sinembargo esey no a sucede y p’esey awor fraccion di PPA ta usa e instrumentonan cu nan tin, cual ta entre otro entrega mocion, pa urgi gobierno pa haci esaki.

Pa loke ta trata Arubalening, parlamentario Pieters a indica cu esey tambe ta otro parti cu PPA a trece dilanti y inclui den nan plan Mi Aruba 2050. Esaki ta e parti caminda cu ta pidi pa duna e studiantenan cu a caba di gradua e periodo di gracia pa nan instala y despues ta yega e momento cu nan ta cuminsa paga nan debe cu un interes hopi abou si nan ta traha pa pais Aruba.

“Esakinan ta puntonan clave. Tin mas, pero enfocando riba e aspecto di studielening, financiamento pa estudio, ta enfoca riba esaki,” el a indica.

Dunando un ehempel di otro punto cu tin efecto tambe pa hobennan cu a gradua y cu kier bin back Aruba, el a menciona con e sector di vacation rentals ta dollarisa e prijs di casnan na Aruba cual tin un efecto enorme riba e studiantenan of recien graduadonan.

El a splica cu PPA a sinta cu parehanan di hobennan cu a caba di studia cu a expresa nan deseo pa cumpra cas na Aruba pero no tin e placa pa esaki, a pesar cu nan tin trabou, tin entrada, pero banco no ta yega e suma pa presta nan e placa pa por cumpra un cas.

“E ora loke ta pasa ta sea nan biba na cas di nan mayornan of nan busca un manera pa bay afo y busca un otro caminda pa bay traha. E ora en bes di haya “braingain” nos ta haya “braindrain” , e profesionalnan ta bay, ta bandona e isla,” el a enfatisa.

Parlamentario Pieters a menciona tambe e rapport cu Ombudsman di Hulanda a traha den cual e ta conseha e islanan CAS y islanan BES pa studiantenan sigui nan estudio mas den paisnan den region y no necesariamente bay Hulanda pasobra e stap ta grandi pa bay Hulanda. El a indica cu e Ombudsman a duna e conseho aki pasobra e probabilidad pa e studiantenan ta mas exitoso den nan estudio ta mas halto ora nan bay studia den region.

El a señala cu esey ta un aspecto, pa studiantenan cu no ta bay Europa pa keda den region. Pa studiantenan cu ya ta na Europa y cu no a finalisa na estudio, Arubahuis t’ey pa guia e studiantenan aki.

Parlamentario Pieters a splica cu Arubahuis tin un programa pa yuda studiantenan mas di cerca pa evita cu nan ta cay afo di nan estudio. El a indica cu semper tin algun cu ta cay afo, pero esey ta gruponan chikito cu talbes toch ta keda biba na Hulanda pa nan por paga nan debe pasobra na Aruba kisas tin chance nan no ta haya un trabou cu ta paga suficiente, mientras cu na Hulanda nan ta ser paga den euro y por paga nan debe back.

“E punto ta cu nos bo no kier pa bo studiantenan bay. Nos por haci miho pa guia e studiantenan di akinan caba prome cu nan tuma e decision pa studia na Hulanda unda cu ta, nan mester haya un bon guia pa por tuma decision di ki profesion nan kier bay haci pa resto di nan bida pa nan por tuma decision corecto y finalisa nan estudio cu exito,” el a subraya.