Pregunta serio riba pasado di director hotel Sero Colorado

ORANJESTAD – Recientemente gobierno a anuncia e nomber di e compania local cu tin e proyecto di hotel na Sero Colorado, cu ta Three Rivers Real Estate N.V. Desde 7 di februari 2019, ta aparece den Registro Comercial di Camara di Comercio nomber di dos director nobo, banda di e compania di trust Intima Management NV, cu tabata director anteriormente y a keda tambe cu e puesto.

E dos nombernan nobo ta di Alejandro Murcia, naci na Spaña dia 29 di april 1985. E otro persona ta Jose Luis Colmenter Guzman, naci dia 31 di juli 1969, na Venezuela.

Un persona di igual nomber, fam y fecha di nacemento ta aparece riba varios website como liga na narcotrafico na Venezuela. Entre otro, e website NoticiasVenezuela.co ta señala den un articulo di 14 di december 2018 titula “Los datos mas importantes sobre el cartel de los Soles y el capo Diosdado Cabello” Jose Luis Colmenter Guzman como un di e personanan liga na e cartel, como number 56 di e lista. Tambe ta menciona su relacion cu Walid Makled, acusa di ta un di e personanan clave den narcotrafico na Venezuela. Makled entre otro a keda aresta na Colombia na 2010 y extradita pa Venezuela na 2011.

E website dateas.com di Spaña, cu tin registra tanto persona como empresa na diferente pais, ta menciona un Jose Luis Colmenter Guzman, naci na Venezuela dia 31 di juli 1965, y ta menciona ademas cu ta un solo persona ta existi den nan registro cu e nomber ey, cu fuera di esey, na Venezuela nan tin registra solamente 4 persona cu e fam Colmenter.

E website Slideshare.net ta presenta den un articulo titula “Las 60 personas mas ricas del regimen Chavez-Maduro” un Jose Luis Colmenter Guzman como number 57 di nan lista, y tambe ta menciona su relacion cu Walid Makled. Ademas, ta menciona cu e Colmenter Guzman aki lo a financia e prome submarino cu Makled a traha y usa pa manda droga pa Merca y Mexico. E mesun lista aki, cu originalmente probablemente ta bin di e website di noticia Argentino Infobae, tambe ta aparece riba e blogsite yama Vozdesdeel destierro di Juan Carlos Herrera Acosta.

E website Noticias Candela ta duna informacion di un Jose Luis Colmenter cu tabata forma parti di un empresa ‘Uno Valores Casa de Bolsa’, interveni, declara bancarota y likida. E tabata forma parti di e hunta directivo di Valle Arriba Athletic Club. Tambe e tabata tesorero di Sanitas de Venezuela y di Farmasanitas, y despues a aparece como miembro dihunta directivo di Banco Activo. Den medionan, segun Noticias Candela, na tabata cuestiona e Colmenter aki di a probecha di su amistad cu e asesor financiero, Baldo Sansó, pa ofrece na empresarionan supuesto servicionan financiero cu tabata bao di restriccion estatal. Baldo Sansó ta ruman di Beatrice Sansó, esposa di Rafael Ramirez, e ex-presidente Petroleos deVenezuela (PDVSA), acusa di a dirigi e corupcion enorme dentro di Pdvsa.

Un Jose Luis Colmenter Guzman ta aparece tambe den registro mercantil na Londres, como ‘miembro designa’ di e compania ‘Connected Capital LLP’. Tocante esaki, mas den e articulo cu ta aparece hunto cu esaki.

Na mei 2015, Bon Dia Aruba a publica cu riba pregunta di e matutino aki, Ministerio Publico di Aruba a declara cu e persona Jose Luis Colmenter Guzman no tabata conoci cerca nan. Esaki a sucede pa motibo di cuestionamento di e persona aki relaciona cu e proyecto hotelero na Isla di Oro, unda tambe e lo tabata envolvi. Manera conoci, e proyecto ey no a continua, sinembargo, e persona actualmente ta aparece como director di e compania Three Rivers Real Estate N.V.

Entre 2015 y awe, a keda sali denuncia contra Colmenter como perteneciente na e circulo intimo di Chavismo. Nos no a mira indicacion di accion hudicial concreto contra su persona.

 

You May Also Like

persona di auto curpa kima

Polis a saca relato di persona perdi auto cu curpa kima

Manera Bon Dia ya a anuncia awe mainta, polis a saca un relato policial ...

InselAir Aruba declara bancarota

Hues a declara InselAir aruba bancarota ayera. Gerencia di e aerolinea a bin cu ...

29 DT Pedofiel (1).JPG

Pueblo ta reacciona cansa y fada di graffiti “ Aruba pro pedofiel”

Tur dia por mira cu mas muraya ta keda susha cu graffiti y tur ...

Ley di ‘All Inclusive’: un aña ta warda riba minister

E ley conoci manera “ley di all inclusive” tabata un debate grandi aña pasa ...

Segundo screening pa cancer di cuero

Riba 14 y 15 di januari ta bay tin un segundo screenmento di cancer ...

Awe referendum historico pa sindicato UPA.

Sindicato STA a pidi un referendum pa e trahadonan di departamento di operacion di ...