Preguntanan na Prome Minister ta ilustra inkietud pa locual ta sosodiendo na WEB NV

Parlamentario di Accion21 Miguel Mansur ta duda den promesa di transparencia y integridad

Con un Prome Minister cu ta encarga cu e sector di energia ta bisa Parlamento dia 23 di Juli cu e no sa nada di problema cu directornan di WEB, y pa 2 di Augustus, ambos a retira cu un ‘golden handshake’ sin cu tin claridad kico a conduci na e desconfianza cu e dos alto ehecutivonan y cuanto a paga nan pa bay.

Esaki ta e pensamento di Parlamentario Miguel Mansur kende a manda un serie di pregunta pa Prome Minister Evelyn Wever Croes, pa medio di Presidente di Parlamento Edgard Vrolijk.

Negociacion cu Eagle LNG

Den un carta, Mansur a formula 17 pregunta riba henter e tema di Eagle LNG y WEB particularmente. E preguntanan ta relaciona cu e declaracion di e propio Director di Utilities Aruba NV, ing. Richard Eman kende a duna di conoce cu un di e iritacionnan cu e dos ehecutivonan, cu awor ta na cas, tabata e inhabilidad di nan pa yega na un acuerdo cu Eagle LNG pa compra di LNG como combustible.

Mansur kier sa ken ta forma parti di e comision cu ta negocia cu Eagle LNG y Quanten Aruba LLC, apunta pa Prome Minister Evelyn Wever Croes y kier sa cua ta e criteria cu e miembronan aki mester cumpli cune pa por a forma parti di e comision.

Mansur tambe kier pa Prome Minister Evelyn Wever Croes facilita Parlamento tur conseho, investigacion y rapport di e comision. Mescos kier pa facilita Parlamento tur conseho, investigacion y rapport cu a laga traha di WEB pa Gobierno di Aruba.

“Mirando cu Prome Minister Evelyn Wever Croes a declara na Parlamento dia 23 di Juli 2021 cu e no ta na altura di ningun plan pa retira e dos directornan. For di ki tempo tin conflicto cu a resulta den e retiro di e directornan,” Mansur ta puntra.”Parlamento por ricibi por escrito e motibo (nan) pa retiro di e dos directornan di WEB y por haya por escrito e sumanan di likides cu dicho retiro a costa WEB NV.”

Mansur kier sa mas di e maneho temporario na WEB y kier sa pa cuanto tempo e “Parlamento por ricibi informacion riba ken lo ta e proximo Director y si esey no ta determina, con e proceso lo cana. Lo tin un solicitacion habri? Kico ta e rekisitonan profesional cu mester cumpli cune?”

Cambio structura di maneho

Pa loke ta maneho di e companianan estatal, Accion21 a bisa den su carta di kier sa si den e ultimo cuater añanan, tabatin cualkier cambio di mandato di accionista, esta Pais Aruba, pa operacion di Utilities Aruba NV, WEB Aruba NV y of Elmar, pa hisa produccion di energia renobabel. “Den e ultimo cuater añanan, tabatin cualkier cambio den e structura di supervision di Utilities Aruba NV, WEB Aruba NV y Elmar NV? A base di cua criterio of procedura di seleccion a apunta miembronan di directiva (pa e companianan estatal aki).”

Miguel Mansur a sigui puntra pa Parlamento di Aruba ricibi informacion si tin cualkier plan pa cambia e structura di supervision di e tres companianan aki.

“Ki conseho Gobierno a ricibi pa cu e cambionan den structura y cuanto a gasta y/of aloca pa e consehonan aki, y bou di cua departamento e gastonan aki a cay?”

E Parlamentario, unico miembro di e fraccion Accion21 a sigui puntra kico Gobierno, como propietario unico, ta haciendo pa sigura un proceso di solicitud eficiente y transparente pa sigura cu ta tuma Directornan capaz pa WEB Aruba NV.

“Parlamento por ricibi por escrito kico ta e papel di Richard Eman den henter e proceso. Y Parlamento por ricibi un copia di e ‘Letter of Exclusivity’ (Carta di exclusividad) firma entre RdA y Eagle LNG dia 14 di Januari 2021, pa e desaroyo un facilidad di gas na Aruba? RdA por a facilita Parlamento un resumen por escrito di e negociacionnan y sucesonan te cu fecha 3 di Augustus 2021.”

Hedging

Miguel Mansur tambe a haci pregunta riba hedging, esta e proceso pa cera contract cu suministradonan di combustible na un prijs fiho, irespecto fluctuacion di prijs. Ta cera un contract asina pa evita cu ta haya un aumento drastico di prijs pa paga. Den pasado WEB NV a cera un contracto di hedging cu a bira un problema pa motibo cu e tabata un contract di largo duracion na un prijs cu a resulta di ta mucho halto, ya cu prijs di petroleo a cay pisa. Den e caso aki, Miguel Mansur a puntra Prome Minister Evelyn Wever Croes si Parlamento por a ricibi informacion te ki fecha tarifanan na Aruba ta cubri pa hedging. “Tin plan pa hedge contra posibel futuro aumento den prijs di combustible? Si esaki ta e caso, ki estudio, conseho ta usa pa tuma e decision aki y por facilita Parlamento cu e (cifranan di) gastonan envolvi cu cualkier hedge den futuro, ademas di tur detaye di cua compania, persona y comisionnan ta envolvi den e dicho transaccion.”

Friends & Family y integridad

Bon Dia Aruba a puntra Sr. Mansur kico a pone manda e preguntanan aki na Prome Minister Evelyn Wever Croes y su contesta tabata simpel. El a bisa cu ta mustra cu e fenomeno di ‘fix cos pa ‘friends and family’ ta sigui. E biaha aki cu bendicion di Raiz. Sigui pone interes partidario y interes personal prome cu interes nacional ta keda ordo di dia,” Mansur a declara.

En todo caso, e falta di transparencia na WEB ta bay contra locual e dos partidonan a priminti cu ta transparencia y integridad. Mansur a ripiti e declaracion di Evelyn Wever Croes di 23 di Juli ultimo, unda Prome Minister a bisa cu ‘politica no a infiltra Utilities NV y cu e no ta na altura di ningun plan di retiro di directornan di WEB.’

“Awor, den menos di dos siman despues, ta retira nan na un gasto enorme pa WEB, y indirectamente pa pueblo. Swa di Prome Minister, Sr. Latti Wever ta e Director Interino y mi ta compronde cu e oficina di abogado di famia di Prome Minister ta representa Eagle LNG. Ambos lo beneficia financieramente di un transaccion pa produci energia cu gas, mientras cu prijs pa pueblo lo subi. Nada di esaki ta cuadra ni cu transparencia y sigur no, integridad,” ta e comentario di Miguel Mansur.

Di otro banda, WEB NV ta un compania estatal pero ta funciona manera un compania priva. Su accionista principal ta Utilities Aruba NV. Pues, aunke cu no kier publica detayenan di e acuerdo cu e dos ex directornan cu a ricibi un ‘golden handshake,’ “al final ta trata aki di un patrimonio nacional. Si berdad ta manehando tur asunto debidamente, kico tin di sconde? Revision di structura di compania estatal ta parti di e landspakket firma cu Hulanda. Pues ban spera cu esaki lo saca politica for di e companianan aki y bin un maneho completamente transparente y eficiente,” ta e comentario di Mansur na Bon Dia Aruba.

Eagle LNG y Energy & Minerals Group (EMG)

Eagle LNG, registra na Houston, Texas ta cay bou Energy & Minerals Group, EMG. Ta trata di un compania di maneho pa un serie di fondo specialisa di capital, y tin 9.6 biyon dollar na compromiso den e industria energetico desde su creacion na 2006. Eagle LNG ta subsidiario di Ferus Natural Gas Fuels, cu ta di EMG. Ferus a cera alianza cu General Electric pa saca gas na Merca y segun nan propio website, ta trahando un planta di LNG na Jacksonville, Florida pa suministra LNG pa mercado marino di Merca y exporta LNG pa islanan den Caribe.