Durante e ultimo conferencia di prensa di inicio di siman, tanto minister Mike de Meza como Prome Minister di Aruba, sr. Mike Eman a purba di evita hinca den e contexto politico di Venezuela e acuerdo y MoUnan cu nan a caba di firma cu Citgo y e gobierno di presidente Nicolas Maduro. Sinembargo e preguntanan di e miembronan di prensa tabata insistente riba e topico aki cu Prome Eman a haya prudente pa bin cu un declaracion breve.
El a bisa cu durante nan biahe na Venezuela nan a firma cu ehecutivonan cu ta dirigi Citgo, pero nan a firma tambe cu e president comisario di e compania. E mandatario a trece como ehempel e caso local di WEB y Utilities, caminda cierto transaccionnan no mester bay te Parlamento, sino cu e mester di aprobacion di Utilities.
Considerando cu e acuerdo aki no a yega te Asamblea Nacional di Venezuela pa su aprobacion, caminda mayoria di nan ta di oposicion di gobierno, premier Eman ta kere cu e structura huridico di Citgo relaciona cu su president comisario ta mescos cu esun di WEB y Utilities.
Tambe el a laga sa cu practicamente e acuerdo aki no a wordo firma tras di lomba di otro sector politico den oposicion cu e gobierno Chavista di presidente Maduro. Den e conferencia aki, Premier Eman a bisa cu e lider di oposicion Henrique Capriles Radonski durante un bishita cu el a haci di transito na Aruba, caminda el a wordo informa tambe di e proceso aki cu tabata canando.
Premier Eman a bisa cu el a papia cu Capriles pa e tambe “ta na altura, los di cuanto di e proceso aki ta wordo discuti den Parlamento di Venezuela”. Minister presidente di Aruba ta haya cu e tipo di discusion aki relaciona cu Asamblea Nacional di Venezuela y e acuerdo final firma cu Citgo ta algo interno di Venezuela mes.
Sinembargo el a expresa cu su gobierno a tuma e responsabilidad cu esnan cu nan a tene contacto cun’e, tambe den e contexto politico di Venezuela, pa nan tambe ta na altura di e desaroyo importante aki cu mester ta algo di periodo largo.
