Den un momento crucial pa reforsa e laso entre Aruba y Hulanda, Prome Minister mr. Mike Eman, hunto cu Minister di Relacionnan di Reino mr. Gerlien Croes, a tene un reunion dialuna 5 di mei cu e Comision di Relacionnan den Reino di Tweede Kamer. E reunion aki ta fundamental pa trata temanan concreto cu por yega na intercambio di pensamento, pero mas importante ainda, pa duna direccion nobo na relacion Aruba-Hulanda riba un nivel di conocemento y ambicion comun.
Prome Minister mr. Mike Eman a enfatisa cu Aruba por cana dilanti den temanan strategico, incorporando institutonan Hulandes den un manera similar manera a pasa den pasado cu TNO, Port Amsterdam y Scheepvaartschool Rotterdam, institutonan cu ta duna un aporte na e desaroyo cu nos ta pone como meta local.
E meta ta pa fortalece un colaboracion structural di economia di conocemento, caminda Aruba ta ofrece su posicion strategico como un “living lab” pa temanan actual manera cambio climatico, innovacion y desaroyo sostenibel cu lo por test prome cu exporta e conocemento aki.
“Nos kier crea un ambiente den Reino caminda Hulanda no ta wak nos como un herencia di e historia colonial, pero ta wak nos como oportunidad pa desaroyo nobo pa Hulanda a base di e pensamento cu nos posicion strategico por habri caminda den e region aki,” Prome Minister Eman a splica. E tipo di reunion personal manera esaki cu e Comision di Relacionnan den Reino, ta fundamental pa crea un sentimento real, cu pasion y ambicion den e dialogo. Por pone tur cos riba papel, pero e sentimento humano y e dialogo directo ta locual ta fortalece un colaboracion duradero, segun un comunicado di gobierno.
Prome Minister Eman a expresa su satisfaccion cu e manera den cual e Comision di Relacionnan den Reino di Tweede Kamer a ricibi e idea di un colaboracion riba nivel di conocemento. Gobierno kier duna mas contenido den Reino, cu un enfoke riba cooperacion strategico y benefico pa tur partido. E industria di conocemento ta un caminda real pa desaroyo y pa trece nos studiantenan back Aruba.
E reunion ta mustra cu Aruba ta cla pa asumi un rol activo den region y den Reino, y cu dialogo y respet mutuo, ta un instrumento esencial pa logra esey.
