E siman aki lo tuma luga un conferencia di hende muhenan den posicionnan den liderazgo na Basel, Suiza. Pa e ultimo 29 añanan Global Summit of Women ta treciendo muhenan di influencia kendenan ta lidera den negoshi y gobernacion, hunto na Suisa pa e conferencia anual sumamente importante y interesante. Premier Evelyn Wever-Croes, teniendo e caracteristicanan aki, tambe a haya un invitacion pa ta un orador na apertura di e conferencia aki.  E conferencia aki lo tuma luga 4, 5 y 6 di juli.

Algo cu a hala atencion di e organisadonan di e Global Summit of Women ta cu Aruba tin un vision economico hopi ambicioso pero specialmente un vision riba innovacion hopi ambicioso y e rol di hende muhe den e parti di innovacion na Aruba. Un biaha mas, e participacion di Premier Wever-Croes na e cumbre aki ta pone Aruba riba tarima internacional. Aruba mas y mas su nomber ta wordo nombra internacionalmente. Y esaki a conduci tambe cu e organisadonan a invita Premier di Aruba pa den e conferencia comparti loke cu Gobierno ta haci na Aruba cu ta asina special.

Aruba tin hopi hende muhe exitoso den e posicion di liderazgo. Un articulo cu a hala hopi atencion den New York Times aña pasa bou di e titulo, ‘Aruba, where women lead’, na unda cu Premier Wever-Croes, Minister Xiomara Ruiz-Maduro y varios muhenan exitoso di nos pais den posicionnan di liderazgo a wordo exponi internacionalmente pa nan exito den lidera. Cu esaki tambe, internacionalmente tin hopi wowo riba Aruba y e desaroyonan cu nos tin.

“Pa mi ta un honor pa expone e desaroyonan y posibilidadnan economico di nos pais den e conferencia aki. Ta hopi importante pa señala cu den e conferencia aki lo participa algun hefenan di estado pero mas tanto lo participa hopi empresario, comerciantenan di negoshinan cu ta hopi exitoso. Riba e tereno di innovacion y specialmente e plannan di Gobierno di Aruba pa eGovernment, sigur lo atrae hopi atencion pa tur esunnan cu lo ta presente”, premier Evelyn Wever-Croes a duna di conoce.