(AP) — Tres cientifico a gana e Premio Nobel di medicina dialuna pa descubrimentonan tocante con e sistema inmunologico sa pa ataca virus y no nos propio curpa.
E trabao di Mary E. Brunkow, Fred Ramsdell y Dr. Shimon Sakaguchi a descubri un caminda clave cu e curpa ta usa pa mantene e sistema inmunologico bao control, yama tolerancia inmunologico periferico. Expertonan a yama e descubrimentonan critico pa compronde malesa autoinmunologico manera diabetes Tipo 1, artritis rheumatoid y lupus.
Den proyectonan separa durante varios aña, e trio di cientifico—dos den Merca y un na Hapon —a identifica e importancia di loke awor ta ser yama e celula T regulador. Cientifico actualmente ta usa e descubrimentonan aki den un variedad di manera: pa descubri miho tratamentonan pa malesa autoinmunologico, pa mehora e exito di transplante di organo y pa realisa e lucha propio di e curpa contra cancer, entre otro.
Brunkow, 64 aña, awor ta un director di programa na e Instituto pa Biologia di Sistema na Seattle. Ramsdell, 64 aña, ta un asesor cientifico pa Sonoma Biotherapeutics, cu ta basa na San Francisco. Sakaguchi, 74 aña, ta un profesor distingui na e Centro di Investigacion di Frontera di Inmunologia na Universidad di Osaka na Hapon.
E premio, oficialmente conoci como e Premio Nobel di Fisiologia of Medicina, ta e prome di e anuncionan di Premio Nobel 2025 y a ser anuncia pa un panel na Instituto Karolinska na Stockholm.
E premio di fisica a ser anuncia diamars, kimica diaranson y literatura lo ser anuncia diabierna. E Premio Nobel di Paz lo ser anuncia diabierna y e Premio Nobel Memorial den economia dia 13 di october.
E trabao cu a gana e Premio Nobel di medicina 2025
E sistema inmunologico tin un manera superpuesto pa detecta y bringa contra bacteria, virus y otro intruso. Pero algun biaha cierto celula inmunologico ta perde control, atacando eroneamente e celulanan y tehido propio di hende pa causa malesanan autoinmunologico.
Cientificonan un biaha a pensa cu e curpa tabata regla e sistema aki solamente den un moda centralisa. Soldadnan inmunologico clave manera e celula T ta ser entrena pa reconoce actornan malo y esunnan cu ta menasa di causa autoinmunidad ta ser elimina den e thymus.
E ganadornan di Nobel a descubri un manera adicional cu e curpa ta mantene e sistema bao control si celulanan inmunologico bira confundi despues y ta considera celulanan humano como intrusonan, loke ta pasa ora un persona tin un malesa autoinmunologico.
Nan experimentonan den raton a mustra cu e caminda di thymus no por ta e unico splicacion. Na 1995, nan a descubri un sub-tipo di celula T no conoci anteriormente, e celulanan T regulador, cu tambe por baha celulanan inmunologico cu ta reacciona manera un ‘security guard’ biologico.
Despues na 2001, Brunkow y Ramsdell tabata trahando hunto na un compania di biotecnologia investigando ratonnan cu un malesa autoinmunologico. Den trabao meticuloso durante un momento unda e mapa gene ainda tabata un campo den desaroyo, nan a descubri cu un mutacion particular den un gene yama Foxp3 tabata culpabel—y rapidamente a realisa cu esey por ta un actor principal den salud humano tambe.
Na Hapon, Sakaguchi a nota: “E tabata ricibi hopi atencion como un gene cu por splica varios malesa autoinmunologico, pero pakico e gene ta causa e malesanan tabata un misterio ainda,” el a bisa.
Dos aña despues, Sakaguchi a conecta e descubrimentonan pa mustra cu e gene Foxp3 ta controla e desaroyo di e celulanan T regulador pa asina nan por frena otro celulanan cu ta reacciona demasiado.
Pakico e trabao aki ta importante
E trabao aki a habri un campo nobo di inmunologia, Marie Wahren-Herlenius a bisa, profesor di reumatologia na Instituto Karolinska.
Te ora e investigacion di e trio a ser publica, inmunologonan no a comprende e complehidad di con e curpa ta diferencia celulanan straño di su mes, Dr. Jonathan Schneck a bisa, un experto di inmunologia celular na Universidad di Johns Hopkins.
Un meta awor, Schneck a bisa, ta pa descubri con pa aumenta e cantidad di celula T regulador—tambe conoci como T-reg—pa yuda lucha contra malesanan autoinmunologico. Esaki lo reduci e necesidad pa e terapianan di awe, cual ta suprimi e sistema inmunologico den manera cu ta laga e pashent vulnerabel pa infeccion.
E descubrimentonan ainda no a conduci na terapianan nobo, Schneck a adverti. Pero “ta increiblemente importante pa enfatisa, e trabao aki a cuminsa na 1995 y nos ta cosecha e beneficionan pero ainda tin hopi mas beneficio cu nos por cosecha” mientras cientificonan ta agrega mas informacion riba nan trabao.
Con Mary E. Brunkow, Fred Ramsdell y Dr. Shimon Sakaguchi a reacciona
Thomas Perlmann, secretario-general di e Comite Nobel, a bisa cu el a yama Sakaguchi den su laboratorio via telefon dialuna mainta “y el a zona increiblemente agradecido, y a expresa cu tabata un honor fantastico. E tabata bastante sorprendi pa e noticia.”
Na un conferencia di prensa oras despues—cu a ser interumpi door di un yamada di felicitacion di e prome minister di Hapon—Sakaguchi a yama su victoria “un sorpresa feliz.”
Brunkow, mientras tanto, a ricibi e noticia di su premio for di un fotografo di AP cu a yega na su cas na Seattle durante oranan tempran di mainta.
El a bisa cu el a ignora e yamada mas tempran di e Comite Nobel. “Mi telefon a zona y mi a mira un number di Suecia y a pensa: ‘Esaki ta un spam di algun tipo.'”
“Ora mi a bisa Mary cu el a gana, el a bisa, ‘No sea ridiculo,'” su esposo, Ross Colquhoun, a bisa.
Ramsdell tabata riba vakantie ora e premio a ser anuncia, y no tabata sa te ora cu e telefon di su esposa a haya señal mientras nan tabata den auto.
“El a bisa, ‘Bo a gana e Premio Nobel.’ y mi a bisa, ‘No, mi no a gana.’ y el a bisa, ‘Si, bo a gana. Mi tin 200 mensahe di texto cu ta bisa cu bo a gana un Premio Nobel’ y mi ta mane, ‘Esaki ta increibel,'” Ramsdell a bisa.
E ceremonia di premio lo tuma luga dia 10 di december, riba e aniversario di e morto di Alfred Nobel, kende a funda e premionan. Nobel tabata un industrialista rico di Suecia y e inventor di dinamita. El a muri na 1896.
E trio lo comparti e placa di premio di 11 miyon kronor di Suecia (casi $1,2 miyon).
