Presidente di Comision di Asuntonan di Reino y Relacion Exterior di Parlamento di Aruba, Sra. Jennifer Arends-Reyes (AVP) a reuni siman pasa cu e comision di Commissie Koninkrijksaangelegenheden en Buitenlandse Betrekkingen (CKABB) di Aruba y griffie di parlamento pa oficialmente cuminsa cu e preparacionan pa e Interparlamentaire Koninkrijksoverleg (IPKO) 2026, cu lo tuma luga na Aruba den luna di februari 2026.

E Interparlamentaire Koninkrijksoverleg (IPKO) ta un reunion formal entre delegacionnan di parlamento di e paisnan cu ta forma parti di Reino di Hulanda, manera Parlamento di Aruba, Parlamento di Corsou, Parlamento di Sint Maarten y Staten Generaal di Hulanda. IPKO ta tuma luga di forma rotativo entre e paisnan di Reino y tin como obhetivo fortalece dialogo parlamentario, cooperacion mutuo y comprension riba asuntonan comun cu ta toca Reino di Hulanda den su totalidad.

Durante e reunion cu CKABB, e presidente a subraya e importancia di IPKO como un plataforma esencial pa dialogo y cooperacion entre e parlamento di e paisnan den Reino di Hulanda. E prome discusionnan a concentra riba organisacion logistico, coordinacion interinstitucional y e temanan prioritario cu Aruba kier pone riba e agenda di IPKO 2026.

Entre e tema nan principal cu ta siendo considera pa e agenda di IPKO 2026 tin desaroyonan geopolitico reciente y nan impacto riba e Reino, bienestar y proteccion di studiantenan di Aruba y e otro paisnan cu ta studia na Hulanda, y e necesidad pa fortalece cooperacion den area di seguridad cibernetico pa proteha institucionnan y infrastructura digital den Reino.

Segun e presidente, ta di gran balor pa Aruba di ta anfitrion di e reunion aki, ya cu esaki ta duna e isla e oportunidad pa fortalece su voz den discusionnan di Reino y pa mustra su compromiso cu cooperacion mutuo, respet y desaroyo sostenibel den Reino.

“IPKO ta un momento importante pa parlamentarionan por discuti riba base di igualdad e reto y oportunidadnan cu nos ta enfrenta como paisnan den mesun Reino,” segun Arends-Reyes. IPKO 2026 ta reuni delegacionnan parlamentario cu nan comisionnan relevante.

E preparacionnan lo sigui den e proximo dianan cu reunionnan presencial y vitural adicional, tanto na nivel local como den coordinacion cu e otro pais di reino. Conforme e proceso ta avansa, parlamentario Arends-Reyes lo comparti mas informacion.