Diasabra mainta tempran Prome Minister Mike Eman hunto cu e team di Baki den Bario a tene un conferencia di prensa anuncia e siguiente localidad pa e accion di Baki den Bario. Un esfuerso cu gobierno hunto cu diferente departamento/instancia ta haciendo pa logra brinda e comunidad e oportunidad pa deshaci di desperdicio tanto di cas como comercial.
E biaha aki, a anuncia cu Veld di Arsenal, na Santa Cruz, lo ta disponibel y prepara pa ricibi tur esnan cu lo haci uzo di e bakinan cu lo pone. E mandatario e menciona cu ta concretisando e solucion di baki permanente den diferente area di nos isla, pero mientrastanto ta mantene e Accion di Bario, cual lo intensifica den transcurso di e lunanan nos dilanti.
Ta gradici no solamente e team, pero esfuerso di companianan manera EcoTech cu a bin ta compaña y conseha e accion di Baki den Bario, como tambe señor Morillo di Veld di Arsenal cu a pone e espacio aki disponibel.
E reto di desperdicio ta uno hopi grandi,despues di e situacion cu a crea door di a cera e dump na Parkietenbos sin trece solucionnan structura y sostenibel. Esaki a haci cu gran cantidad di comunidad no tin manera financieramente pa deshaci di nan desperdicio residencial.
E accion di Baki den bario lo tuma luga otro siman diasabra, 28 di october riba Veld di S.V. Arsenal na Angochi Santa Cruz, cuminsando tempran mainta. Pa 7:00 am tin miembronan di Baki den Bario presente caba pa dirigi e fluho riba e veld.
Ademas di contribui cu e veld como localidad pa e proximo accion, a yega na e meta tambe pa revitalisa e veld y cuminsa prepara esaki pa asina e porta operacional un biaha mas. E veld tin aproximadamente dos aña cu e no ta activo, y lo tin mester di mantencion inmediato. E tribuna cu den gabinete anterior a keda instala ta den malcondicion pero pronto lo mira restauracion. Esaki ta conta tambe pa iluminacion y e resto di trabou grandi cu tin pa haci pa asina mira e veld aki back den condicion optimal.
