Home Deporte Preparacionnan 12 Hours of Aruba a cuminsa

Preparacionnan 12 Hours of Aruba a cuminsa

300

edicion di e evento di mountainbike ‘12 Hours of Aruba’ a cuminsa. Participantenan tin un luna pa train y inscribi pa e evento. Teamnan participante mester core mas tanto buelta posibel den 12 ora. E careda ta cuminsa diasabra, april 14, pa exactamente 6:00pm di atardi y lo termina diadomingo, april 15, pa exactamente 6:00am di mainta. Cu esaki e 12 ora di ciclismo a termina y ta identifica e nomber di e evento, pues 12 Hours of Aruba. Cada buelta ta di aproximadamente 4 kilometer y ta cuminsa na Kapel di Alto Vista.

E ruta ta uno conoci pa mayoria coredonan di mountainbike y cu ta consisti di varios bahada y subidanan tecnico cu biradanan skerpi y complica. Tur menciona ta retonan cu e coredonan lo bay enfrenta. “Un di e retonan mas grandi ta cu di e 12 oranan coriendo, 10 di nan ta den scuridad. Esaki ta conta pa coredonan cu ta bay participa pa prome biaha, pero tambe pa esunnan cu ya den pasado a participa na e careda aki”, segun e organisado Wim Eelens den un comunicado cu nan a manda. E aña aki lo bira e di cuatro edicion. Cada aña mas coredonan ta dicidi di participa. Na 2015 a participa 21 ekipo consistiendo di 100 mountainbikers.

Na 2016 esaki a crece cu 10 ekipo mas, pues 31 ekipo cu 134 mountainbikers. Y na 2017 esaki a conta cu 140 mountainbikers y 33 ekipo. Coredonan cu ta participa ta bin di paisnan manera: Curaçao, Venezuela, Colombia, Hulanda, USA y naturalmente Aruba; pues un ambiente ciclistico internacional. E participantenan por scoge pa participa e aña aki for di tres categoria.

E categorianan ta como lo siguiente; team di duo (homber, muhe of mix), team di 4 coredo (homber, muhe, mix) of team di 6 coredo (homber, muher, mix). Pa e prome categoria esta duo, e coredonan mester tin e edad di 18+, y e edad di e otro dos categorianan por cuminsa for di 15+. Mario Nooijen, cu ta forma parti di e organisacion, ta splica con cada ekipo mester core den e sistema pa alivia.

“Cada ekipo ta reparti e 12 oranan den bueltanan segun nan condicion fisico y rapidez di cada coredo. Durante cada buelta, 1 miembro di ekipo lo core 1 of mas buelta; esaki ta decision di cada coredo/ekipo cuanto nan lo core. Na momento cu un coredo dicidi cu e kier cambia, esaki lo sosode na final di e buelta den un espacio indica como Seccion di Cambio (wisselvak). Esaki ta e sistema pa alivia.

Ora e cambio tuma luga e siguiente coredo na su turno lo bay core mas tanto buelta cu e por pa despues bolbe y haci e cambio.” Na final di e 12 oranan e team cu a core mas buelta lo resulta ganado absoluto. Sr. Nooijen kier pone enfasis cu ningun coredo lo bay core ruta pa 12 ora su so. “Logicamente cu coredonan cu ta participa den e categoria di duo lo core mas cu e otronan cu ta den e categoria di 6 persona.” Neon ta un obligacion cu tur participantenan mester tin luz dilanti y patras riba nan mountainbikes.

E aña aki organisadonan lo bay tin un premio special pa e mountainbike mas bunita drecha cu luznan neon. E ‘Neon Bais’ mester resalta henter anochi y marduga. “Nos ta conta cu e creatividad di nos participantenan pa decora nan bais. E lo ta algo masha bunita mes pa wak”, sr. Nooijen ta finalisa bisando den e comunicado