Diahuebs riba e plataforma di red social Facebook a surgi un video di un grupo di persona den Parada di Luz na San Nicolas lastrando un stroller cu loke ta parce tres mucha chikito den dje. Inmediatamente comunidad di Aruba a expresa nan indignacion y a haci yamado un bes mas pa autoridadnan atende cu e tipo di casonan aki.

Tabata un usuario cu a bati alarma riba e plataforma, unda el a haci comentario expresando su sorpresa y frustracion cu adultonan ta bay cu baby den Parada di Luz. Un rato despues, e usuario a publica e video unda por a mira un grupo di persona lastrando un stroller den cual tabatin tres mucha chikito drumi. E muchanan tabatin bisti ‘noise-canceling’ headphones pa protege nan oido. Asina mes, e video a causa un ola di indignacion, unda hopi a subraya e iresponsabilidad di e personanan aki.

Varios den comentario no por a kere kico nan tabata mira. Varios a expresa nan preocupacion cu e muchanan.

“Ey,…bandi caminda. Mucha na soño…baby…mucha di 7-8 aña. Gewoon, sin gevoel!”

“Berdad cu orea ta pa pero ban serio, no ta nan edad pa experencia e tipo di eventonan aki anochi, JAMMERRRRR!!!!”

Segun varios ta comenta, esaki no ta prome biaha cu e grupo specifico aki ta hiba nan yiu den parada. Den un otro video publica, por a mira e mesun stroller pasando den parada di Jouvert Morning, cu dos mucha chikito bisti cu headphones canando banda di e personanan responsable pa nan.

Hopi usuario a lansa critico na e grupo di carnaval, puntrando con por ta cu e lider di grupo por a permiti esaki pasa. Algun tambe a haci yamado na Cuerpo Policial, SMAC y hasta Voogdijraad pa atende cu e asunto aki.

Den un comunicado manda diabierna, minister di Husticia tambe a tuma nota di e suceso y a expresa su preocupacion pa e muchanan. E minister ta enfatisa cu mayornan tin e responsabilidad legal pa bienestar y siguridad di nan yiunan, y a haci yamado na mayornan y organisadornan asumi responsabilidad y tuma decision consciente, entre otro:

  • No hiba muchanan chikito na parada largo;
  • Percura pa suficiente awa, sombra y descanso;
  • Modera consumo di alcohol, specialmente ora bo ta responsabel pa un mucha;
  • No stuur ora bo a bebe;
  • Y pone interes di e mucha semper prome.

Segun Codigo Penal di Aruba y regulacionnan relaciona cu proteccion di menor, pone na peligro salud of siguridad di un menor por ta un acto castigabel. Den caso serio, esaki por resulta den persecucion penal, multa of otro medida legal.

Di otro banda, hopi den comentario tambe a enfatisa cu Cuerpo Policial tambe mester ta mas atento, cu varios sugeriendo pa mayornan cu trece baby den parada di adulto ser obliga pa bay cas. Un usuario a cuestiona si polis lo por a mira e grupo den Jouvert, na cual un otro a enfatisa cu si, “paso nan a pasa mi dilanti y mi tabata para bandi polis dilanti joe laveist e momento ey,” manera e comentario ta bisa.

Desafortunadamente, e caso aki no ta algo isola. Bon Dia Aruba a reporta caba na 2024 tocante e tendencia di algun mayor pa hiba nan yiunan chikito den parada di adulto, den un ambiente inadecua y posiblemente peligroso pa e criaturanan.

Esaki ta un tema cu tur temporada di carnaval ta bin pa dilanti y ta capta atencion, pasobra despues di tanto aña y tur e informacion ariba cuido di mucha, ainda tin mayor cu ta haci esaki.

Tur aña den preparacion di temporada di carnaval, varios fundacion di famia ta dedica na cuido di mucha y ta haci diferente campaña pa conscientisa mayornan di e peligronan cu ta existi den hiba muchanan na paradanan di adulto. Suficiente informacion tin, ya cu tur aña e fundacionnan aki ta publica riba red social, ta publica comunicado y ta hasta parti buki informativo pa publico.

Ta lamentable cu ainda, a pesar di tur e esfuersonan aki, tin mayornan cu ta hiba nan yiunan chikito na paradanan di adulto y pone nan den un cantidad di peliger.

Cu bista riba Parada Grandi e weekend aki, ta importante pa un bes urgi na mayornan di muchanan chikito pa sea responsable cu e salud y bienestar di nan yiunan, y no somete nan na un ambiente cu por trece daño na nan oido y por pone nan seguridad den riesgo.