Dialuna, 15 di December 2025, di 6.30 pa 9.00 di anochi lo tin presentacion di e buki titula “70 Aña Statuut – 7 dékada di engaño, hipokresia i kolonialismo krioyo” na Biblioteca Nacional Aruba, Madurostraat 13, Oranjestad.
E publicacion ta trata e deficit democratico cu Corsou ta experencia den e relacion cu Hulanda como pais ‘autonomo’ den Reino Hulandes.
Statuut ta e elemento mayo di e deficit democratico aki. E buki ta mustra claramente cu meta di politica Hulandes ta continuacion di colonialismo. Alabes e documento ta mustra riba e rol determinante di colonialismo crioyo den mantencion di e posicion di Corsou como colonia pa medio di Statuut y otro strategianan cu politica hulandes ta aplica. Ta trata di un analisis profundo di kico ta e supuesto Reino Hulandes cu Corsou ta forma parti di dje.
Cua ta e strategia colonial Hulandes y kico ta e instrumento di dominio cu yama Statuut?
Pa por comprende e problema actual ta necesario pa tira un bista den historia y analisa e procesonan cu a tuma luga. Esaki lo yuda pa forma un vision con lo kier sigui den futuro.
E publicacion aki ta un contribucion valioso na conocemento historico di politica colonial Hulandes. Un adkisicion valioso pa e lucha sagrado di decolonisacion.
E obra “70 AñaStatuut – 7 dékada di engaño, hipokresia i kolonialismo krioyo” ta skirbi pa e hurista y antropologo cultural mr. dr. René Rosalia fundado di Akademia Popular Errol Schoop y lider politico di Movemento Kousa Promé.
Mr. dr. René Rosalia lo ta na Aruba na Biblioteca Nacional Aruba pa presenta e obra “70 Aña Statuut”. Un pueblo informa ta un pueblo cu defensa!
E buki “70 Aña Statuut” lo ta obtenibel durante e anochi aki.
Un y tur ta cordialmente bon bini dialuna 15 di December 2025 na Biblioteca Nacional Aruba di 6.30 pa 9.00 p.m. Entrada ta gratis. Pa informacion MirtoLaclé 742-6274.
