Evento di moda organisa na Grot di Lourdes na San Nicolas como parti di ArtWeek 2026 a provoca reaccion fuerte den comunidad, despues cu imagen y video di un momento particular a circula riba rednan social. Ta trata di un momento durante un presentacion, den cual un modelo a basha biña cora riba su paña dilanti di e grot. Esaki a genera critica di hende cu ta considera cu e lugar tin un significado religioso special y cu e actividad no tabata apropia pa e sitio.

E actividad, Art Fashion: Nature × Mankind, a tuma lugar diaranson 9 di september como parti di ArtWeek 2026. E evento ta combina moda, arte y sostenibilidad, cu creacionnan inspira pa naturalesa y e relacion entre ser humano y medio ambiente.

E topico di debate den comunidad ta e escogencia di Grot di Lourdes como escenario pa e actividad di moda. E grot na San Nicolas ta un lugar cu pa hopi Catolico na Aruba tin un significado religioso y spiritual importante. P’esey, algun ciudadano a cuestiona si un sitio asina mester ser uza pa un evento di moda y entretenimento.

E critica a bira mas fuerte despues di e presentacion durante cual un modelo, para dilanti di e grot, a basha un likido cora, segun comentarionan tabata biña cora, riba su paña. E escena a forma parti di un presentacion artistico, pero pa algun persona e combinacion di e acto, e lugar y e cercania di e imagen di Birgen Maria a pasa e limite entre expresion artistico y falta di respet.

Den reaccionnan riba rednan social, varios ciudadano a expresa cu nan ta considera e acto un falta di respet pa Mama Maria. Otronan a critica con hendenan presente a actua como si nada no a pasa na e momento y, segun algun comentario, algun di esnan presente tabata hasta hari durante e presentacion. Pa e ciudadanonan e asunto no ta solamente tocante moda of arte, sino tocante consideracion pa e significado cu un lugar religioso tin pa un parti di comunidad.

Pero no tur reaccion tabata negativo. Otro hende a argumenta cu no mester confundi un estatua of imagen religioso cu Dios mes y cu e presentacion artistico no necesariamente tabatin intencion di ofende creyentenan. Tambe tin esnan cu a señala cu Grot di Lourdes ta un lugar publico cu ta ser bishita diariamente pa tanto local como turista, cu ta consumi bebida alcoholico durante nan bishita na e sitio. Ademas nan a menciona cu bebemento di biña tampoco ta completamente inusual den contexto religioso, ya cu esaki ta forma parti di cierto celebracion y ceremonia Cristian.

E reaccionnan ta mustra cu e discusion ta bay mas leu cu solamente e presentacion di moda. E discusion ta principalmente tocante te unda arte por bay, specialmente ora un evento ta tuma lugar na un sitio cu pa hopi hende tin un significado religioso special.

Tema di Art Fashion y Aruba Art Fair pa 2026 ta Nature × Mankind. E meta ta uza arte, moda y otro forma di expresion pa provoca dialogo tocante relacion entre hende y naturalesa, sostenibilidad y impacto humano riba planeta. Art Fashion ta ser presenta manera un pasarela cu ta uza moda manera un medio pa conta storia y transmiti mensahe.

E evento a genera diferente opinion den comunidad, cu algun hende ta mira e presentacion como expresion di arte, mientras otro ta considera cu Grot di Lourdes no tabata un lugar apropia pa un evento di e tipo aki.