Sosten di Hulanda durante 2021 ta basa riba condicion di reforma y ta reformanan cu Raad van Advies tin hopi aña ta urgi Gobierno pa haci, particularmente riba e area di finanzas publico.
Asina e organo consultativo mas halto di Aruba ta bisa den su relato anual. E sosten di Hulanda a bin pa yuda Aruba surpasa e crisis sin precedencia di COVID-19 y realidad ta cu sin ayudo di Hulanda, Aruba lo tabata den problema mas grandi cu awor ta e caso, segun e Presidente adhunto di Raad van Advies Rik Timmer den e relato anual. “Mester tin un finanzas publico sostenibel pa por wanta shock, ademas cu e ta condicion pa un sociedad den balans cu por haci e inversionnan necesario pa desaroyo continuo di nos hendenan,” Timmer a remarca den su introduccion.
E Presidente adhunto a mustra cu ya ta pa añanan ta pusha Gobierno pa bin cu reforma structural riba diferente area y den e relato anual di 2020 a inclui esakinan den un grupo di cinco conseho, cu na final tambe a keda inclui den e landspakket cu ta bay ta e liña di guia pa e proximo añanan, dirigi pa COHO.
Raad van Advies, den su conseho riba COHO a bisa Gobierno pa tuma e iniciativa su mes pa traha hopi di cerca cu sector priva pa implementa e reformanan aki. Esaki ta e unico forma pa envolvi comunidad y crea un plataforma mas amplio y asina crea un posibilidad mas grandi cu e solucionnan cua scoge ta esnan corecto pa Aruba.
Timmer a bisa cu tabata pa prome biaha den hopi tempo cu Raad van Advies por a duna conseho riba un concepto di rijkswet (COHO y Raft) y cu Gobierno lo por haci uso di consehonan di e trayecto di continuacion pa yega na mas ley di Reino. Raad van Advies lo kier mira cu esaki ta bira algo fiho y cu reglanan di procedura riba temanan cu ta toca paisnan di Reino ta keda discuti na nivel di Reino. Esaki ta pa yuda atende cu problemanan conoci, manera e periodo cu Raad van Advies ta haya pa conseha y publica su pensamento.
A pesar di tur limitacion, Raad van Advies por a funciona bon na 2021 y a keda produci su trabou di conseho na tempo y cu e nivel di calidad di custumber, Rik Timmer ta ilustra. “Manera Frits Goedgedrag (red. ex Presidente Raad van Advies) a indica den su prefacio di e cuenta anual di 2020, su miembresia y presidencia di Raad van Advies a termina dia 1 di November 2021 pa motibo di a yega e edad maximo permiti. Nos ta hopi gradicido na Sr. Goedgedrag pa su conocemento, esfuerso, y particularmente e bon cooperacion den e ultimo ocho añanan. Raad van Advies a presenta un candidato pa asumi e cargo di Presidente desde Juli 2021, pero te ainda no a ricibi ningun decision. Conforme e ley, automaticamente e miembro cu tin mas tempo den e conseho ta bira e Presidente adhunto te ora cu nombra un Presidente nobo.” Timmer a bisa cu e tin e honor di ta e miembro cu mas aña den e conseho. “Practicamente 10 aña. Y den e tempo cu a transcuri, e forma di traha a cambia hopi. Por ehempel, tempo cu mi a asumi e cargo den e Conseho, e tabata custumber ainda cu tur miembro ta haya e documentonan riba papel y hunto ta repasa esakinan. Na e momentonan aki nos ta traha particularmente di forma digital,cu tur su beneficionan. Pero nos ta mira cu anticipacion pa reuni den persona.”
E constelacion di e Raad van Advies a cambia pa motibo cu Sr. Goedgedrag a yega edad di 70. Y manera ta custumber a tene un procedura di solicitud habri pa yena e vacatura. Despues di a repasa, a nombra Sr. Johannes ‘Hans’ Ruiter den Raad van Advies. E otro miembronan, David Kock, Marlon Agunbero y Eugene Martis ta completa e resto di e funcionnan den e Conseho. Sr. Rolf van der Zande a uni na e bureau cientifico di Raad van Advies despues cu a bin un vacatura. E bureau ta consisti di Sr. Albert Braamskamp, Angelique Peterson, Wendy op de Weegh-Kort y Dave Passchier, cu sosten di Jacqueline Thiel-Lacle y Nancy Morales.
Na comienso di e prefacio di e relato anual di 2021 a papia caba riba e COHO y e RAft. Pero Raad van Advies a dicidi pa dedica e tema di e cuenta anual na e dos rijkswetnan aki, y e retonan ademas di oportunidadnan cu nan ta trece cune. “Raad van Advies ta urgi pa un acercamento nobo den Reino pa traha hunto y asina implementa e reformanan,” Rik Timmer a urgi.
Pero, asina mes, den su introduccion, e Presidente adhunto a sinti cu ta necesario pa papia di e Landsverordening integriteit ministers, cu a drenta na vigor prome di Januari 2022. “Raad van Advies a conseha ripitidamente durante curso di añanan, cuminsando na 2015 y na ultimo, na 2021 riba e materia aki. Ta mira e ley aki como un instrumento importante pa integridad di gobernacion. Spera cu na 2022 lo sigui pasonan manera un proposicion di iniciativa pa integridad di Parlamentarionan, pa asina pone un fundamento huridico fuerte, riba cua por sigui traha na integridad administrativo y madurez democratico,” ta e deseo di Raad van Advies, vocifera pa e Presidente adhunto drs. Rik Timmer.
Bon Dia Aruba lo amplia riba e tema cu Raad van Advies a scoge pa su relato anual den nos proximo edicion.
