Presidente Bolsonaro ta stroba cualkier accion pa mitiga daño; Deforestacion na gran escala di Amazonas Brazilero

Miembronan di e tribu indigena di Amazona, Mura, ta desespera di mira con nan hogar ta keda destrui. E deforestacion di e selva Amazonas na Brazil a subi pa e di tres luna consecutivo, segun data di Gobierno. Esaki a pesar cu Presidente di Brazil Jair Bolsonaro a priminti cu ta bay yuda e enforsamento di leynan ambiental.

Na Mei, e deforestacion a subi cu 67 porciento compara cu e mesun periodo na 2020, y mayoria di e tereno a bay pa cria ganado, agricultura y tambe pa palo pa fin comercial.

Den e prome cinco lunanan di 2021 a rosa un area cu ta tres biaha mas grandi cu e ciudad New York, un total di 2548 kilometer cuadra.

Deforestacion ta yega na su punto culminante durante e periodo seco, di Mei pa October, ora cu e ta mas facil pa personanan cu ta corta mata ilegalmente pa bende e palo yega den e selva.

Bolsonaro a priminti riba Dia di Tera na April cu e lo redobla e suma pa enforsa leynan ambiental, pero e dia siguiente el a firma e presupuesto di e pais cortando e gastonan pa proteccion ambiental.

Minister di Medio Ambiente Ricardo Salles mesora a entrega un proposicion pa Ministerio di Economia pa hisa su gastonan pa medio ambiente, pero e peticion no a haya reaccion. Y Bolsonaro no a responde na peticion di Reuters pa un comentario.

Deforestacion den Amazonas a incrementa enormemente desde cu Bolsonaro a bira Presidente na 2019, kende a pidi pa desaroya areanan natural protegi y a critica e maneho di proteccion ambiental. Presidente di Merca, Joe Biden ta den negociacion cu Brazil pa potencialmente financia esfuersonan pa conserva Amazonas, pero ehecutivonan ta bisa cu no por spera accion mesora.

Agencianan ambiental manera Ibama a bolbe tuma e liderazgo pa proteha e selva, pero Gobierno no a aumenta nan subsidio. Segun Marcio Astrini, hefe di e grupo activista Observacion Ambiental di Clima a bisa cu e deforestacion ta prueba cu no mester kere den e promesa di Bolsonaro di lo proteha e selva. “E ta promesanan bashi,” el a bisa.

Pa haci e situacion pio, e selva di Amazonas a pasa den un periodo di yobida cu menos awa, for di November te cu April, cu ta hisa e risico pa candela. E area cu mas risico ta conoci como e arca di deforestacion. “E periodo di yobida a pasa cada y e tabata un temporada malo,” Marcelo Seluchi, meteorologo na e centro di monitor di desaster, di e Ministerio di Ciencia a bisa. “E temporada di candela lo ta bay ta hopi malo.”