(Infobae) – E strategia promovi pa presidente di El Salvador a bira un tema central durante un conferencia conhunto cu presidente electo di Chile, den medio di pregunta tocante supuesto violacion di garantia fundamental.

Presidente di El Salvador, Nayib Bukele, a defende su politica di siguridad dilanti di critica for di organisacionnan internacional di derecho humano, ora el a ser consulta durante un conferencia conhunto cu presidente electo di Chile, Jose Antonio Kast, ken a bishita e pais Centro Americano pa tene un reunion oficial prome cu asumi su cargo.

Critica riba strategia di siguridad di gobierno Salvadoreño a gana forsa den lunanan reciente. Amnesty International y Human Rights Watch a adverti riba supuesto violacion di derecho fundamental durante e implementacion di loke ta conoci como e “metodo Bukele”, cu a genera controversia den e region debi na e severidad di su medidanan pa combati insiguridad y trato di personanan vincula cu crimen organisa.

Bishita di Kast na El Salvador a subraya e relevancia internacional di e debate, mientras diferente sector social y politico ta discuti limite di uso di forsa den e lucha contra violencia.

Respuesta di Bukele na defensa di su modelo

Durante un ronda di pregunta na e conferencia conhunto, un periodista di Chilevision Noticias a puntra presidente Salvadoreño tocante su posicion frente na kehonan internacional riba supuesto violacion di derechonan humano den su politica di siguridad.

Bukele a recorda cu tur hende tin derecho, incluyendo criminalnan, pero el a cuestiona e enfoke exclusivo cu, segun e, e organisacionnan aki ta mantene.

Presidente Salvadoreño a declara: “Loke mi no ta compronde ta dicon nan semper ta enfoca riba derecho humano di nan criminalnan, cu nan tin. Dicon e enfoke ta riba derecho humano di esnan cu ta masacra, cu ta mata mucha, cu ta viola muhe, cu ta corta cabes?”

Bukele a afirma cu su administracion a priorisa derechonan humano di e poblacion inocente y trahador: “Nos a priorisa derechonan humano di hende honesto y despues nos ta mira, claro, derechonan humano di asesinonan”.

El a respalda su posicion cuestionando e accionnan anterior di organisacionnan denunciante: “Mi lo duna algun balor na tur e kehonan cu e organisacionnan aki a haci si nan a keha anteriormente contra esnan cu a viola, mata, asesina, planta bom, corta man, corta cabes. Pero nan no a haci esey y awor solamente criminalnan ta importa”.