Aruba Voetbal Bond (AVB) a suspende su presidente, Sr. Randolf Lacle, inmediatamente. Segun un carta cu a circula riba rednan social ayera, tabatin varios punto pakico e federacion a tuma e decision di suspende su presidente.
E carta, firma pa vice-presidente Jomar Boekhoudt y secretario general, Achmed Nunes, ta menciona cu e federacion a tuma e decision pa suspende Sr. Randolf Lacle inmediatamente di su debernan como presidente di AVB di acuerdo cu Articulo 13 paragraf 7 y conhunto cu Articulo 37 y Articulo 38 di HHR (regla y regulacion interno).
Tambe a menciona cu ta bay cuminsa un investigacion interno riba asuntonan di AVB, e situacion fiscal y e conducta di e presidente den esakinan. Basa riba e resultado di e investigacion, ta bay convoca un reunion general di miembro di AVP, durante cual ta bay evalua e suspension y lo por discuti medidanan adicional.
E carta ta resumi e mal conducta di cual ta acusa e presidente como lo siguiente:
1. E presidente tabata negligente y no a paga impuesto debi riba payroll y e premienan social den nomber di AVB;
2. Como resultado, AVB a ricibi un dwangbevel (exigencia di pago) for di Departamento di Impuesto;
3. E presidente a sconde e existencia di e dwangbevel aki for di bestuur di e federacion;
4. Dia 28 di maart 2025, mayoria di miembro di bestuur explicitamente a autorisa e Secretario General pa tuma contacto cu DC Tax & Accounting pa obtene mas informacion tocante e dwangbevel. A pesar di esaki, e presidente a ignora e decision aki, y contrario na instruccion di e bestuur, personalmente a bay DC Tax den nomber di AVB;
5. E presidente e ora a duna instruccion na DC Tax explicitamente pa no comparti ningun informacion cu e Secretario General relaciona cu e situacion financiero di AVB, minando asina seriamente e confiansa den e Secretario General;
6. Dia 21 di september 2024, e presidente a manda un carta titula “Finanzas di AVB” na miembronan di AVB, den cual el a declara – den nomber di bestuur – cu AVB tabata al dia cu su obligacionnan na DIMP. Sinembargo, esaki no tabata cuadra cu berdad mirando e existencia di e dwangbevel, y por constitui falsedad por escrito;
7. E conducta aki ta den conflicto serio cu e interesnan di AVB y fundamentalmente ta mina confiansa den e presidencia.
Basa riba e puntonan aki, ta conclui cu e presidente a faya seriamente den su debernan bao Articulo 38 sub b, f y i di e HHR; y cu suspension ta necesario pa protege e interesnan di AVB y pa preveni mas daño na e federacion.
Di manera indirecto, Sr. Lacle a rechasa e acusacionnan mediante un post riba su pagina di Facebook, compartiendo un imagen cu e palabranan: “No hay almohada mas comoda que una consciencia tranquila.”
Mas investigacion den mundo di deporte
Riba e mesun dia cu e noticia aki a cuminsa circula, minister di Deporte, Gerlien Croes a anuncia cu ta bay haci un auditoria na Fundacion Facilidadnan Deportivo, FFD.
Dialuna mainta den un rueda di prensa, Croes a informa di varios situacion y reto cu a bin encontra den e area di deporte. Manera palabra den e acuerdo di gobernacion, lo haci un inventarisacion di e desaroyonan den e ultimo añanan y alabes di e situacion actual, a bin encontra documentonan y indicacion cu mester haci un inventarisacion debido den diferente fundacion.
For di un documento cu a ser obteni di aña 2018, crea pa e compania PWC, por a saca afo cu desde e tempo ey caba tabata tin indicacion cu tin necesidad urgente pa haci cambio den maneho, inventarisacionan financiero, situacionnan di personal den e fundacion, cu nunca a wordo haci. Desde 2018 pa awor, diferente otro situacionnan a presenta den diferente di e fundacionnan cu mester di atencion serio.
Segun un comunicado di gobierno, gabinete AVP-Futuro a priminti “Good Governance” y esey ta conta tambe pa fundacionnan cu ta maneha finanzas den deporte. Varios di e fundacionnan aki ta ricibi subsidio di Gobierno di Aruba y mester tin transparencia y claridad si e fondonan aki ta wordo aloca debidamente pa asina logra e metanan stipula.
Banda di e retonan conoci manera e situacion na Simeon Antonio, tambe tin reto na Compleho Deportivo Frans Figaroa, unda cu e veld no ta apto pa e weganan tuma luga riba e tereno. Joe Laveist tambe ta actualmente cera. Despues di a identifica mas reto, a encontra suficiente motibo pa inicia cu un auditoria pa locual ta e maneho di e fundacion F.F.D.
E mandatario a sigui bisa cu mas informacion y detaye lo ser comparti den tur transparencia asina cu e rapportnan keda cla. “Cada florin cu e Gobierno aki ta saca for di su caha, ta un florin di e pueblo aki y na final di dia lo cual cu nos ta destina pa comunidad mester wordo destina debidamente, pero tambe e mester verifica si ta logrando su meta”.
Den cuadro di esaki ta comunica na comunidad cu e inventarisacion a inicia y ta lidera door di C.A.D. cu mas partner pa asina trata pa acelera e proceso y pa haya un bista cla di tur e desaroyonan di e ultimo añanan den e fundacion menciona.
Minister Croes a termina bisando cu tin hopi mas desaroyo cu lo wordo comparti cu pueblo den e simannan binidero y ta su deber pa informa comunidad di tur lo cual a bin ta encontra. “Mester busca solucion. Pa busca solucion, bo mester tin un bista cla di con e situacion ta di berdad y a base di esey e inventarisacion a inicia den FFD”.
