Presidente di Parlamento di Aruba, Juan (Ady) Thijsen a declara na Bon Dia Aruba cu e mes a yama e reunion publico di diaranson ultimo.

E ta kere cu tabata bon pa gobierno por a bini cu cierto informacion relaciona cu e apoyo financiero otorga pa Hulanda pa e paisnan Caribense den reino por atende cu nan crisis interno genera pa e virus Covid-19. Esaki basa riba articulo 36 di statuut di reino Hulandes, caminda Hulanda mester duna nos ayudo, entre nan financiero, den e situacion actual. Un ayudo no solo pa atende cu e parti di salubridad, pero pa lanta nos economia bek.

Sr. Thijsen no kier crea controversia innecesario. Pero e ta lamenta y considera no husto cu Hulanda ta probecha e crisis actual pa bin cu condicionnan pisa. P’esey nan a bin cu e reunion aki pa gobierno por bin cu informacionnan, entre otro riba kico a wordo palabra cu Hulanda. “Bo mester sa pa tuma cierto decision,” el a bisa.

Presidente di parlamento a referi tambe na e mocion presenta pa parlamentario Setty Christiaan-Yarzagaray y aproba unanimamente cu 20 voto cu excepcion di un voto di parlamentario Dowers cu no tabata presente, el a bisa. Importante di e mocion aki –segun presidente di parlamento– ta cu Hulanda a laga traha un rapport di Economisch Bureau Amsterdam cu e titulo ‘Kleine eilanden, Grote uitdagingen’.

P’esey nan a dicidi di bin y aproba un mocion, pasobra nan ta haya cu e tipo di rapport traha pa Economisch Bureau Amsterdam no ta duna e realidad di loke nos ta pasando aden. Segun presidente di parlamento, den e rapport aki nan ta yega na conclusion sin puntra nos instancianan local. E ta haya cu e tipo di conclusion aki no ta bon. Pa medio di e mocion aki a pidi minister di Finanzas y Economia, Xiomara Ruiz-Maduro pa asina parlamento por haya for di CBS y Economic Zaken, un rapport lihe. “Pa mustra kico ta e realidad di nos,” el a bisa. Sr. Thijsen ta considera cu e mocion aki ta un di e cosnan bon cu a sali for di e reunion aki.

 

Sr. Thijsen a bisa cu pais Aruba tabatin un situacion financiero prome y despues di e crisis di Covid-19. Prome cu Covid-19 gobierno a logra baha den dos aña e deficit presupuestario pa un surplus di 49 miyon den su presupuesto 2020. Pero awor cu Covid-19 a presenta na Aruba, nos a yega na e situacion nada facil di solicita ayudo financiero basa riba statuut di Reino pa atende cu tur e situacion interno cu nos ta pasando aden. “Nos unico pilar economico a dal abao,” el a bisa na Bon Dia Aruba. Segun Standard & Poor’s nos ta e pais den Caribe cu a haya e impacto mas grandi di e crisis causa pa Covid-19. Cu e tipo di reunion aki, el a bisa cu parlamento por haya informacion pa asina nan por ta na altura di cierto desaroyo.

Na final, presidente di parlamento a cualifica cu e reunion a bay bon. Aunke e ta reconoce cu tin cosnan cu no ta mucho cla. Mester bin mas claridad riba nan, pasobra esaki ta parti di e trabao di control cu parlamento tin. Tambe e ta haya cu tin cierto politica ta wordo hunga. Encuanto e presencia di polis sin publico den tribuna di parlamento, Sr. Thijsen a bisa cu esaki ta para den e reglanan di parlamento. Den tur reunion publico, polis mester t’ey, aunke actualmente no tin acceso na publico debi na e situacion di Covid-19. El a bisa cu pronto parlamento ta bay den reces, y ora cu nan ta cuminsa bek, tur protocol lo ta cla pa publico por atende e reunion aki.

El a gradici tanto na minister presidente, Evelyn Wever-Croes y minister di Finansa y Asunto Economico, Xiomara Ruiz-Maduro kendenan a bin parlamento pa informa riba nan decisionnan relaciona cu e apoyo financiero den forma di fiansa na cero interes otorga pa Hulanda na e paisnan Caribense den reino. E kier mustra cu e tipo di reunion aki ta refleha cu democracia ta funciona, parlamento cu su responsabilidad y gobierno cu su responsabilidad.