Sindicato di Duana (SADA) ainda ta wardando pa por reuni un biaha mas cu nos mandatario, despues cu gobierno a entama un caso sumario contra e accion cu e cuerpo uniforma a bin cune dia 11 di september ultimo.
Presidente di SADA, Edward Maduro ta lamenta cu gobierno no a haya oido na e solicitud cu e hues a haci. For di diabierna mes despues di e caso, SADA a manda dia 13 di september un carta pa gobierno, pa mustra nan disposicion pa sinta papia, pero nan no a haya contesta, y tampoco un invitacion pa un reunion.
Ademas e periodo cu hues a duna pa cuerpo di Aduana no a bay den accion ta solamente un luna, y e dia ta yegando y gobierno no ta tratando pa bin cu un solucion. Dia 12 di october awor ta vence e periodo cu hues a duna pa ambos parti por sinta y resolve nan impasse riba structura salarial, entre otro.
SADA a yega di sinta cu Mediador di Gobierno, ya cu e funcionario aki tambe ta envolvi pa duna su intermediacion, ademas Mediador tambe tabata den corte dia di e caso. Segun e sindicalista Maduro, Mediador di Gobierno a priminti nan pa haya un reunion cu gobierno. Pero minister presidente siman pasa no tabata na Aruba, y te ainda SADA ta wardando pa por haya un reunion.
E ta un situacion cu –segun presidente di SADA– ta desapunta nan, ya cu constantemente SADA ta wordo puntra si nan por tende algo di nan dunado di trabou, esta gobierno. Esaki ta crea un incertidumbre mas grandi cerca e duaneronan, principalmente cu for di aña pasa gobierno a yega di bisa cu lo cumpli cu nan.
Si e fecha di dia 12 di october yega, un alternativa di SADA lo ta di bay corte pa pidi hues ehecuta loke a wordo firma. Ya cu nan miembronan a bisa cu e acuerdo ta keda vigente, y nan no ta bay un paso mas atras, ya cu nan tin mas cu 2 aña wardando riba gobierno.
“Nan ta dicidido y disgusta di e manera con nan ta wordo trata, pasobra semper gobierno a bisa cu nan ta bay cumpli,” e sindicalista a bisa. Pero e ta haya cu na ultimo ora, dia 9 di september ultimo, gobierno a bisa cu no lo cumpli mas.
