Presidente di sindicato SPA, Jose Dirksz a yama un conferencia di prensa unda cu ta expresa e disgusto cu ta biba den e ultimo dianan aki di loke a sucede di e situacion di tiramento na San Nicolas. Pa cuminsa, pa bo bira un polis e persona no por tin un strafkaart y despues di esey e persona mester pasa 7 diferente test pa asina por drenta e opleiding di polis y caba e opleiding y sirbi su pais Aruba.

Loke cu a ripara ultimamente cu den prensa nan ta gewoon saca potret di polisnan den uniform den medionan di comunicacion, lastra nan comosifuera e polisnan ta criminalnan, sinembargo e criminalnan mes nan ta tapa nan cara. Segun presidente di sindicato SPA, un polis ta un funcion ehemplar, esey kiermen si tin un famia caminda cu tin un miembro ta polis, mayoria di biaha ta cerca e polis ey nan ta bay pa conseho. Den un manera di bisa polis ta un tata di e pueblo aki. Na momento cu ataca un polis bo no ta ataca e polis so, pero su famia y e resto di su coleganan cu tambe ta den servicio di polis.

Despues cu cierto insinuacionnan a sali den media, presidente di sindicato SPA a tuma contacto cu Korpschef y a haci e pregunta, kico ta pasando? Y e contesta tabata cu tin un investigacion ta andando ainda cu ta lo contrario na loke a sali den cierto medionan, unda cu practicamente nan a saca conclusion. Tabata falta solamente pa e caso bay dilanti huez manera e la keda poni den medionan di comunicacion, y esaki ta un acto cu sindicato SPA ta condena totalmente.

Tipo di insinuacion asina por causa impacto social innecesariamente cu por haya cu pueblo por lanta innecesariamente contra di polis, mientras cu esey no ta e berdad. Segun presidente di sindicato SPA, na momento cu e investigacion keda cla y e keda treci padilanti, e ora por sa precies kico a pasa.

E auto ta den beslag den warda di polis. Presidente di SPA no por compronde dicon un ciudadano civil, con e por a drenta den warda di polis haci investigacion riba un auto cu ta den beslag y manda esey prensa. Esey ta un situacion totalmente condenabel. Presidente di sindicato SPA kier sa cu ken su permiso e ciudadano civil a haci e investigacion aki y tambe kier sa e agente cu ta atende cu e investigacion aki, si e ta na altura di tur e fechorianan cu ta pasando y kico ta bay haci riba e situacion aki.

KPA mes tin su departamento cu ta BTFO; nan ta e personanan cu ta autorisa y ta huramenta cu nan por haci e investigacionnan aki. Esaki kiermen cu nan proces-verbaal ta bay dilanti di hues cu lo determina kico ta bay pasa.

Loke cu por a compronde di henter e situacion aki ta cu ta e abogado a trece e ciudadano aki pa haci investigacion. Pero loke ta un realidad ta mas cu obvio cu un sospechoso ta paga un abogado pa haci trabao p’e y e trabao di e abogado y e otro personanan mester ta na fabor di e sosopechoso y no contra, sino nan no lo pag’e pa su trabao, segun persidente di sindicato SPA.

Loke cu a sucede na e momentonan aki e parti di e sospechoso ta wordo publica, pero e investigacion mes no a caba. Y mas cu logico na momento cu un investigacion no caba, no lo por bay cune den medionan.

Sindicato SPA ta condena completamente loke ta pasando y ta spera cu esnan cu ta maneha KPA tambe atende cu e asunto aki y bin dilanti, debi cu na momento cu ataca bo yiunan den cas bo ta pendiente pa ta na defensa di su yiunan. P’esey mes ta di spera un ora pa otro esnan cu ta maneha KPA tambe lo tin su reaccion riba henter e situacion aki.

Un proses-verbal of un rapport cu sali for di KPA y cu no a sali di ministerio publico bay na terceros, den e caso aki ta media, e ta castigabel.

Presidente di sindicato SPA ta kere cu un investigacion riba e parti aki ta di aprecia debi cu e ta algo totalmente condenabel. Awe e por ta e caso aki , y mañan e por pasa den un otro caso tambe y esaki ta inaceptabel unda cu cuerpo policial no lo ta confiabel mas. Cada bes cu un situacion asina aki pasa e por daña un investigacion completo. Presidente di SPA ta duna di conoce cu esaki ta e prome paso cu nan ta tuma unda cu ta desaproba e actuacion di e medio concerni, cu ta instiga pueblo contra polis, siendo cu hefe di polis mes a duna di conoce cu e investigacion ta andando ainda. Con un medio di comunicacion ta saca conclusion siendo cu e investigacion ta andando.

E abogado y e ciudadano cu a bin haci e investigacion automaticamente ta declara na fabor di nan cliente y logico nan no lo declara cosnan contra di nan cliente. Integridad di polis ta hopi importante y entre shelo y tera nada no ta keda scondi. Si den un organisacion asina grandi unda cu toch tin polisnan ta presta nan mes pa saca informacion nan mester bay para pa nan actonan debi cu saca informacion di KPA pa duna prensa ta un acto castigabel.

Den e caso aki, e polisnan ta haya nan atencion y tambe e dama envolvi ta haya su atencion manera e procedura ta cana.