Presidente di SNBA, Andres Hernandez: San Nicolas tabata den estado economico dificil y awor ta pio

Prome cu Covid a bati nos porta, San Nicolas su actividad comercial no tabata mucho di gaba. Pero awor cu e crisis di e virus aki a dal nos y henter mundo, el a caba di daña e cuenta den e districto historico aki.

E inactividad comercial aki ta wordo refleha riba e escultura di e personahe emblematico di Lolita, cu tur dia ta warda un potencial cliente pa bende su productonan riba plaza dilanti di Post Aruba. Presidente di San Nicolas Business Association (SNBA), Andres Hernandez no ta nenga cu e impacto di e Covid crisis ta afecta henter nos isla. Pero San Nicolas tabata den un estado dificil caba economicamente y awor ta pio.

Sinembargo nan por a ripara cu tin negoshinan cu ta existi pa añanan, caminda ta mustra cierto actividad. “Pero en general San Nicolas su actividad ta hopi abao” el a declara.

SNBA tin alrededor di 120 miembro, pero aworaki cu e crisis nan ta wak cuanto di nan ta bay keda. E negoshinan mas solido semper t’ey. Pero si tin hopi tienda chikito cu SNBA mester haci un reevaluacion pa sa cuanto di nan ta keda existi y cuanto no.

No tur negoshi estableci pariba ta miembro di SNBA. Nan kier bin cu un inventarisacion. Sinembargo Hernadez ta pensa cu e tiki miembro cu nan tabatin, por lo menos nan lo baha mas cu un 20% pa 30%. Nan ta haya dudoso cu e negoshinan chikito aki lo por sobrevivi, y habri bek, principalmente e negoshinan cu ta paga huur.

Segun Hernandez, Covid a dal nos tur, pero esaki no ta na Aruba so. Sinembargo e ta haya cu nos isla ta bendiciona. A pesar di e dos caso positivo cu a wordo registra dialuna ultimo, nos ta un isla cu pa casi dos luna tabata Covid free. Den e caso aki mester reconoce e diferente bon maneho di gobierno y comportamento di pueblo mes. “E ta duna e grandesa cu e pueblo tin,” el a bisa.

Awor e situacion ta cu nos mester habri bek nos frontera gradualmente pa reactiva nos economia, ya cu e ta hopi necesario den cualkier nivel. SNBA ta wak cu hopi positivismo cu tin companianan cu ta lantando, entre nan un flowershop y compania di construccion. Ya caba nan a cuminsa tuma contacto digitalmente cu e asociacion aki, ya cu nan kier ta parti di dje.

E sector pariba mas prominente antes (sin inclui refineria) tabata compania di contratistanan. Otro sector tabata e negoshi di paña, sector bancario y negoshinan conoci di bar. Tambe tin algun industria cu ta opera na San Nicolas.

Proyectonan

Igualmente el a laga sa cu di e 36 proyectonan di fast track cu gobierno ta duna prioridad pa stimula nos economia, tin no mas cu dos cu a toca San Nicolas. “Anos semper ta keda patras…,” el a bisa. Nan ta mira cu esaki ta un custumber caba den tur gobierno di tur asignacion.

Entre e proyectonan grandi y prometedor tin e hotel na Baby Beach. SNBA ta den comunicacion estrecho cu companianan grandi entre nan cu e grupo di Secrets Baby Beach Aruba. Nan a papia cu e famia Martinón, caminda nan kier wak prome con e desaroyo lo sigui tuma luga cu e crisis aki na Aruba. Pero si SNBA por a ripara cu ainda tin movecion chikito riba e tereno riba cual e hotel aki lo bini na San Nicolas.

Apart di Secrets tin e grupo di Azure cu tin su proyectonan. Recientemente SNBA a reuni cu nan pa haya un actualisacion riba nan proyecto. Pues e decision ta den man di gobierno actualmente y no di Azure, segun Hernandez. Tambe tin otro gruponan cu nan interes pa sigui nan proyecto pariba t’ey. Tambe tin e proyecto di cannabis medicinal y criadero di galiña. Igualmente tin varios proyecto di plantacion di cuminda. Tur e proyecto hunto aki ta crea un speransa grandi pa San Nicolas y bisindario.

SNBA a haci esfuerso pa promove nan actividad comercial na San Nicolas y bisindario. Dos siman pasa nan a lanta un website. E ta un shopping store digital: www.pariba.aw cu e meta di stimula benta.

E servicio aki a wordo ofreci gratis pa tur e comerciantenan di pariba. Pero ta lamentablemente un grupo chikito di comerciantenan si ta probecha e iniciativa aki cu SNBA a percura di bin cune cubriendo tur gasto di mantencion. Actualmente un miembro di e directiva ta bishitando cada negoshi pa saca potret di nan pa subi nan den e website aki di SNBA.