Presidente di Parlamento tin tur intencion pa trece cambio den forma con e organo legislativo ta funciona y si e mester usa su habilidadnan como docente, e lo haci’e tambe.

“Ya caba mi ta traha segun e structura cu mi tabata usa na scol,” mr. Edgard Vrolijk a bisa Bon Dia Aruba.

Na momento cu a sinta cu e Presidente di Parlamento nobo, e tabata lesando e codigo di conducta di Tweede Kamer, cu ta unicamente cinco. Esakinan ta cu e Parlamentario ta ehecuta su funcion den tur independencia y den interes general; e no ta acepta regalo of fabor cu tin intencion pa influencia su trabao; e Parlamentario ta cumpli cu e obligacionnan di registracion cu e funcion ta exigi; e Parlamentario no ta usa informacion cu e ta ricibi den su funcion, pa interes personal, y ta garantisa, si mester, e caracter di confiabilidad di e dato; y finalmente e Parlamentario ta actua segun reglanan di Tweede Kamer.

Pero ta e Parlamentarionan mes ta esnan cu mester dicidi ki direccion Parlamento ta bay y ta nan mester acorda e reglanan di conducta, Edgard Vrolijk a bisa. Esey ta nifica raporta ora cu yega pa reunionnan. “E ta djis pa mi sa. No ta cuestion cu mi mester bay cana rondia e Parlamentario,pa mira si tin quorum. Mi mester percura cu tin quorum y e ora ta keda na e Parlamentario pa dicidi ki ora e ta den e sala. Nos mester modernisa, pero nan ta bisa cu mi kier tin control riba nan.”

No ta cuestion di control

Den otro palabra Vrolijk ta rechasa e nocion cu e kier controla e Parlamentarionan na tur momento. “Ta poco reunion tin. Mayoria ta reunionnan publico of encuentronan publico cu lo por considera (moralmente) obligatorio, pero nan no ta. E punto di bista ta cu tur 21 Parlamentario ta igual (e Presidente ta haya e mesun salario, cu excepcion cu e ta haya placa pa auto). Ma bisa nan cu mi kier pa tur hende ta aki pa quorum, pa nos traha mas eficiente.”

Pa tal motibo Vrolijk kier introduci e sistema di carchi pa drenta, pa di forma cu unabes e Parlamentario ‘swipe’ pa drenta, automaticamente e Presidente sa cu e Parlamentario ta den e edificio. Pero e no mester ta den sala di Parlamento, pasobra e Parlamentario por ta den su oficina ta atende yamada por ehempel. “E oradonan mester percura cu nan ta presente den sala y na final di dia tur hende mester ta presente pa votacion. E ora mi no mester suspende e reunion pa mira si tin 11 hende presente, of cu hende mester keda sinta sin cu por lanta pa necesidad. Ta e eficiencia ey mi kier introduci, pero nan ta keda ‘old school,’ hasta e jongnan,” Vrolijk a bisa, kende a bisa cu el a pone su reglanan for di comienzo, haciendo uso di con e tabata traha na scol. Pero asina mes, algun Parlamentario ta yega laat, y si tin quorum, esta 11 miembro presente, e ta habri e reunion sin warda riba otronan.

“Semper ta asina cu ora di firma e lista di orador, tur ta gusta warda wak ken ta pone nan nomber. E ta mas bien un reaccion. Pues, ma dicidi cu mi ta cer’e asina cu reunion cuminza. Awor si ta djis pone nomber y tur mi reunionnan ta cuminza na ora.”

Seguridad

Edgard Vrolijk ta enfatisa cu e reglanan aki ta conta ora cu tin reunion. Dianan cu no tin reunion, e Parlamentarionan ta liber pa haci nan trabao for di unda nan ta. Es mas, un Parlamentario no tin ora. “E ta simplemente cu mester swipe ora cu tin reunion. Nan ta kere cu mi ta bay controla nan cada minuut. Esey no ta e intencion. Ami tampoco ta mara na e edificio aki.” Den otro palabra, Edgard Vrolijk como Presidente di Parlamento kier un organisacion cu ta funciona eficiente, sin cu e ta stroba e Parlamentarionan pa haci nan trabao pa keda mantene contacto cu comunidad.

Pero, realidad ta si cu ta e Parlamentarionan mester traha y acepta e reglanan. Nan ta e legisladornan. Y “hopi no kier firma pa un codigo di conducta.”

Riba dje, Servicio di Seguridad di Aruba, VDA, tambe a urgi pa hisa e nivel di seguridad den Parlamento y pa haci esey, mester sa ken ta den e edificio. “Nos ta drenta tur ora, hasta den fin di siman y anochi. Y VDA mester por sa ken ta paden, en caso algo mester pasa.”

Mester mas disciplina

Los di e codigonan di conducta, Edgard Vrolijk ta admira e disciplina di Parlamentarionan Hulandes. Aunke e no ta de acuerdo cu tur locual Hulanda ta trece, e tin cu admiti cu Hulandesnan ta hende disciplina y esey ta algo cu na Aruba por siña di dje. “P’esey nos ta unda nos ta awe. Y e ta conta pa nos poblacion tambe, pasobra si nos poblacion ta vota consciente, nos no ta den e problemanan cu nos ta aden awor aki.”

Y ta esencial cu e comunidad realisa cu mester di disciplina pa compronde kico ta sosodiendo y kico ta bay sosode, por ehempel cu economia, asuntonan social y otro areanan cu ta afecta bida diario. “Nos ta papia hopi di funcion di ehempel, voorbeeldsfunctie. Pero si nos mes no duna e ehempel, hamas e poblacion lo siña. Y ta yega momento cu tur hende papia di mesun idioma. Por ehempel cu awor ta ora pa corta cierto caminda, pasobra a lo largo e ta trece beneficio. Pero e wega politico ta cu ta bay yama e pasonan necesario ey un medida mas.” P’esey Vrolijk ta kere cu e miho forma pa yuda canalisa e funcion di Parlamento ta pa ta directo cu tur. “Hende sa cu mi ta MEP, pero mi ta bay ta fastioso cu tur. Mi a bisa Prome Minister esey tambe. Mi ta tuma e posicion aki (di Presidente di Parlamento), pero mester laga mi traha si, pasobra mi no ta kere Ministernan por influencia e bay bin aki den. Ami a wak tur e leynan atrasa, y mi por bisa, cu ‘ik ga werken.”