Manera ta conoci Minister di Enseñansa, Gerlien Croes, a bin ta reuni cu Sindicato di Maestro di Aruba (SIMAR) y otro sindicatonan pa dialoga riba e restructuracion salarial pa maestronan. Durante e reunionnan aki ambos banda a presenta nan proposicionnan tocante con e restructuracion por tuma luga.

Manera ta conoci e veld di enseñansa ta luchando pa logra un restructuracion salarial pa e maestronan pa algun tempo caba. Desde 1990 no tabatin aumento di salario pa maestro, cual ta un periodo basta largo y awor maestronan kier un fecha pa esaki por bin na vigor.

Den un video publica riba plataforma di SIMAR, presidente di SIMAR, Angelique Quijada a splica cu locual minister Croes a presenta na e sindicato ta cu nan a cuminsa cu e prome fase di e proceso di e restructuracion salarial, cual ta inclui e gelijktrekking (igualacion).

El a splica cu pa varios aña tin un diferencia grandi entre maestronan di kleuter y basis school cu maestronan di voortgezet onderwijs pa loke ta trata salario y igualacion di e salarionan aki ta e prome fase cu lo ser implementa.

El a sigui splica cu e igualacion ta bay tuma luga den tres aña. E prome aumento ta bay ta na 2026, na 2027 nan lo ricibi e di dos aumento y e ultimo aumento ta na 2028. Tur e maestronan cu ta den schaal 13 ta bay schuif pa schaal 34 y tur e otro maestronan di tur e schaalnan lo ricibi un aumento di 3.49% den nan salario.

Quijada a indica cu e proposicion di minister Croes tambe ta inclui cu grandura di klasnan lo cambia y bira mas chikito. Por ehempel klas di voortgezetonderwijs aworaki tin 28 alumno, lo bira 24 alumno maximo y 16 alumno minimo.

El a indica cu tambe normjaartaak, cual ta e cantidad di ora pa aña cu un maestro ta traha. El a splica cu “teaching time” ta e oranan cu ta duna les y “instruction time” ta contact cu e maestro tin cu e muchanan. Tur oranan di reunion y di profesionalisacion tambe ser hinca den e oranan pa aña.

Fase un ta ser implementa entrante 1 di januari 2026. Pa loke ta fase dos, el a indica cu esaki lo ser implementa na februari 2026. Esaki, el a splica, ta simplificacion di e salarishchaal pa entre cinco pa seis, adaptacion di salario di klas assisstent, maestro y directornan, cual lo bira tambe los di e edad y acopla na beloningsbeleid (e maestro lo por ser compensa monetariamente pa cualkier curso cu ser realisa).

Ayera presidente di SIMAR a publica otro video den cual el a splica cu diaranson nan a reuni pa di dos biaha cu e Minister di Enseñansa durante cual nan a presenta seis proposicion cu ta basa riba loke nan miembronan a expresa.

Uno; gleiktrekking di enseñansa primario na schaal 35 y 5% di aumento pa no tin discrepancia, y tur maestronan haya 5% di aumento den nan salario brutto.

Dos; pa toelage di lider di scol y director conta pa nan pensioen, gelijktrekking di toelage di lider di scol y director na enseñansa primario y enseñansa secundario.

Tres; pa toelage di docentenan di SPO cu tin masters den Special Needs Education ser hinca den nan salario, y pa toelage di supervisornan interno ser hinca den nan salario, pa e conta pa nan pensioen y no tin problema manera tur aña.

Cuater; pago di maestronan di eerste grad diploma a pesar di e nivel di enseñansa.

Cinco; pa maestronan cu ta bay baha cu pensieon aki tres aña, ricibi gelijktrekking completo desde 1 di janauri 2026.

Seis; e aumento entrante 1 di janauri 2025. E proposicion aki Quijada a indica a ser bari for di mesa inmediatamente pasobra segun minister no tin placa y e no tabata presupuesta.

El a remarca cu locual minister a trece dilanti tocante e proposicionnan ta cu nan lo mester bolbe haci calculacion.

El a agrega cu locual minister di enseñansa a lubida di menciona ta cu e persona di DRH cu mester haci e calculacion, ta bayendo cu vakantie y adicionalemnte, el a indica cu e preparacion pa tratamento di presupuesto mester ta cla entre fin di oktober y comienso di november locual ta duna sindicatonan poco tempo pa negocia na mesa.

Extra informacion cu Quijada a indica ta cu pensionadonan cu ta trahando pa dia1 di januari 2026 den articulo 8 lo bin un aftrekpost adicional di 10 mil florin.

“E deseo di veld ta mucho mas profundo mirando cu tin 35 aña ta wardando riba un restructuracion salarial husto,” el a enfatisa.