Recientemente, Oficina Central di Estadistica (CBS) a publica e Indice di Prijs di Consumo pa luna di december 2025. Den esaki a nota cu prijs di coriente y awa no a cambia compara cu november 2025.
Prijs di utilidad (electricidad y awa), gasolin y diesel ta ser determina primordialmente door di e prijs internacional di petroleo. Na December 2025 e prijs promedio pa bari di petroleo (US$ 58.02) a conoce un caida di US$ 1.98 (-3.3%) compara cu November 2025 (US$ 60.00).
Prijs di electricidad y di awa no a cambia compara cu November 2025. Consecuentemente, e prijs promedio di electricidad pa vivienda a keda Afl. 263.67, mientras cu e prijs promedio di awa pa vivienda a keda Afl. 168.73.
Prijs di gasolin a registra un subida di Afl. 2.00 cent (0.9%) na December 2025 y tabatin un efecto di 0.04 ppt riba e CPI.
Prijs di diesel a registra un subida di Afl. 8.50 cent (4.3%) na December 2025 y a causa un efecto di 0.01 ppt riba e CPI.
Na December 2025, utilidad, gasolin y diesel como grupo, tabatin un subida den prijs di 0.3% compara cu November 2025 y hunto tabatin un influencia di 0.05 ppt riba e CPI, mientras cu e restante 404 bienes y servicio hunto, a conoce un subida di prijs di 0.4% y tabatin un efecto di 0.35 ppt riba e CPI.
