Recientemente, Oficina Central di Estadistica (CBS) a publica tur dato di e Indice di Prijs di Consumo pa luna di april ultimo. Den esaki, a nota un aumento leve den prijs di cuminda.
E indice di “Cuminda & servicio di catering” a registra un aumento leve di 0.02% na April 2025, despues di a registra un caida di 0.1% na Maart 2025.
E indice di “Cuminda na cas” (0.1%) a registra un aumento, unda seis (6) di e diesun (11) indicenan di e gruponan di cuminda na cas a subi na April 2025.
E indice di “Batata, yuca y batata dushi” a conoce e aumento di mas grandi (3.3%) na April 2025.
Otro aumentonan significante a wordo registra den e indicenan di “Bebida no-alcoholico” (1.3%) y “Berdura” (1.1%).
E caidanan mas grandi a wordo registra den e indicenan di “Lechi, keshi y webo” (-0.7%) y “Fruta” (-0.7%) na April 2025.
E indice di “Cuminda pafo di cas” a registra un caida di 0.1% na April 2025.
Na April 2025, “Cuminda na cas” y “Cuminda pafo di cas” como grupo, tabatin un aumento leve di prijs di 0.02% compara cu Maart 2025 y hunto tabatin un influencia insignificante riba e CPI, mientras cu e restante bienes y servicio hunto a experencia un aumento di prijs di 0.5% y tabatin un efecto di 0.39 ppt riba e CPI.
