(TheNewYorkPost) – Un miembro di realesa Saudi cu a pasa mas cu dos decada den un coma despues di un accidente di trafico na Londres a fayece cu 36 aña di edad.
Prins Al-Waleed bin Khalid Al-Saud a sufri un sangramento cerebral y interno den e accidente na 2005, tempo cu e tabatin apenas 15 aña di edad. Conoci ampliamente como e “Prins Drumi”, tabata manten’e riba un ventilator den hospital – pero e nunca a recupera conocemento.
Prins Al-Waleed tabata e yiu mayor di prins Khaled bin Talal Al Saud, kende a confirma su morto den un post riba X. Citando un verso di e Quran, el a skirbi: “Cu curasonnan keriendo den boluntad y decreto di Allah, y cu dolor y tristesa profundo, nos ta di luto pa nos yiu stima: prins Al-Waleed bin Khaled bin Talal bin Abdulaziz Al Saud, cu Allah tin misercordia di dje, cu awe el a fayece.”
Prins Al-Waleed tabata studiando na un scol militar na Londres na momento cu el a resulta involucra den e accidente devastador den trafico. Despues di e accidente, el a keda hospitalisa na e Ciudad Medico Rey Abdulaziz den capital Saudi, Riyadh, unda el a keda den un coma desde esey.
Tata di prins Al-Waleed nunca a perde speransa cu su yiu un dia lo por haci un recuperacion completo.
El a keda involucra den cuido di e prins, y firmemente a rechasa yamado pa retira sosten medico.
E hashtag “Prins Drumi” na Ingles (Sleeping Prince) tabata un tendencia riba rednan social despues di e anuncio, cu miles di persona ofreciendo condolencia.
Oracion funeral pa e prins a tuma lugar na e moskee Imam Turki bin Abdullah na Riyadh.
