(AP) — Prins Harry a sigui den e pasonan di su defunto mama diaranson door di cana riba un caminda den un tereno di mina di tera activo na Angola pa conscientisa pa e trabao di un organisacion caritativo pa kita explosivonan for di zonanan di guera bieu.
E Duke di Sussex ta den e pais sur Africano hunto cu e organisacion Halo Trust, e mesun grupo cu Prinses Diana a traha cune ora el a bay Angola na januari 1997, shete luna prome cu el a muri den un accidente di auto na Paris.
Diana su defensa y e imagen di su canamento dor di un campo di mina a yuda mobilisa sosten pa un tratado di prohibicion di mina cu a keda ratifica mas laat e aña ey.
Harry a cana dor di un tereno di mina banda di un pueblo na Cuito Cuanavale den sur di Angola, segun Halo Trust. No ta prome biaha cu e ta retrasa e pasonan di su mama despues di a biaha pa Angola pa un campaña di conscientisacion similar na 2019.
E minanan di tera den henter Angola a keda atras for di guera civil di 27 aña di 1975 pa 2002. E Halo Trust ta bisa cu por lo menos 60.000 hende a muri of ser herida pa minanan di tera for di 2008. E ta bisa cu el a localisa y destrui mas cu 120.000 mina di tera y 10000 otro aparato explosivo den Angola desde cu e la cuminsa traha den e pais na 1994, pero 1.000 campo di mina ainda mester ser limpia.
