(AP) – No por nenga e impacto cu smartphone y tablet tin riba vehiculonan moderno. Si bo mira den casimente cualkier vehiculo nobo, bo lo haya un touchscreen of te hasta un gran cantidad di botonnan cu tin e meta di mehora e funcion di botonnan mecanico. E bunitesa ta obvio, Un cabina cu e elementonan aki di diseño cu ta mustra clasico y moderno. Sinembargo, tin algun contra cu no semper ta ser considera.

E personanan cu no a yega di experiencia un di e vehiculonan nobo aki te ainda no sa ki pa busca ora di evalua e tecnologia. Cu esaki den mente, expertonan di Edmunds a crea un lista di algun pro y algun contra na e touchscreen cu cierto vehiculonan tin, pa asina yuda cada persona individualmente determina si esaki ta algo di nan interes of no. Anteriormente nos a trece dilanti algun punto caba, y awe nos ta trece algun punto mas.

Mas funcion por keda agrega na e vehiculo

Den temponan recien, ta spera cu un auto nobo su pantaya por haci dobel of tripel e trabao normal. Esaki no solamente mester traha via e fabricante di e vehiculo su programacion sino tambe Apple CarPlay y Android Auto Smartphone su sistemanan integra. Imagina e cantidad di boton necesario pa por ehecuta y haci uso di tur tres sistema.

Di e fabricante su perspectiva, un touchscreen den e auto aki ta yuda e diseñadornan mirando cu nan no mester busca caminda pa agrega mas boton y asina por duna e interior di e vehiculo un estilo mas chic. Un bon ehempel di esaki ta Tesla Model S. Casimente tur funcion den e vehiculo ta den e centro di e touchscreen. Te hasta e funcionnan cu bo no ta spera manera e luznan direccional, windshield su wiper y e luznan ta localisa riba e touchscreen.

Kia EV6 ta otro ehempel notabel. E tin un rij di botonnan cu ta usa pa control di clima pero por completamente cambia na controlnan di volumen pa medio di pres un solo boton. E problema ta cu si bo kier ahusta bo temperatura, y bo ta riba e funcion incorecto, bo ta subi volumen na luga di esaki.

Punto central di fayo

E ta un gran bentaha pa tin mas funcion den un vehiculo moderno, sinembargo e problema di pone tur di esaki den un solo luga ta cu si e pantaya paga, bo no tin acceso na ningun di e funcionnan aki. Esaki a pasa na Edmund su editornan den varios ocasion mirando cu e programacion no ta completamente desaroya.

Mas unico
 Mirando cu e botonnan virtual den e vehiculo no ta fisicamente den un luga, esaki ta habri porta pa haci bo pantaya mas unico. Riba e Tesla Model 3, por ehempel, e chauffeur por cambia e posicion di e botonnan di acuerdo na nan preferencia. Di manera similar, den 2022 Lucid Air, e chauffeur por crea diferente perfil unda cu nan por warda nan preferencia pa cu e stuurwiel, nan asiento y volumen, di manera cu cada chauffeur por cambia na su ahustenan preferi rapidamente.

Tur hende tin un preferencia pa cu e manera con nan ta interactua cu nan vehiculo y con nan ta haci uso di su tecnologia. Ora bo ta na un agencia di auto of bo ta cumprando un auto, specialmente ora cu e ta un di e vehiculonan moderno cu tecnologianan avansa, sigura cu bo lo verifica si e manera cu e pantaya ta funciona ta bon pa bo persona. Si bo no ta un fanatico di e tecnologianan aki den bo auto, en especifico e touchscreen, considera marcanan manera BMW, Genesis, Mercedes-Benz of Mazda, mirando cu nan tur te ainda ta haci uso di e botonnan fisico den nan vehiculonan.