Diasabra ultimo, mediante un comunicado di prensa, Hospital Dr. Horacio Oduber a informa cu tabata enfrentando un problema tecnico cu e sistema di friamento, cu a laga pashent, bishitante y empleadonan den calor.
“Lamentablemente awe 28 di juni Horacio Oduber Hospital (HOH) ta enfrentando dificultadnan tecnico cu e sistema di koeling,” HOH a bisa den e comunicado. “Esaki tin un impacto riba e piso ful abao, e prome piso y tambe piso dos di e Toren B.”
E hospital a informa cu tin un team tecnico ta trahando duro hunto cu e team tecnico di SOGA “pa soluciona e situacion fastioso aki lo mas pronto cu ta posibel.”
“Nos ta compronde e incomodidad cu esaki por causa nos pashentnan, bishitantenan y empleadonan na e momentonan aki. HOH ta haciendo su maximo esfuerso pa soluciona e problema di e sistema di koeling lo mas pronto cu ta posibel den e areanan cu ta wordo afecta.”
E hospital a termina dunando danki na henter e team di HOH y SOGA, “cu ta trahando duro pa soluciona e problema aki y danki na nos pashentnan, bishitante y coleganan pa nan comprension.”
Mientras cu HOH a informa di e problema aki diasabra, usuarionan di rednan social tabata comenta indicando cu nan a ripara problema di calor den HOH di algun tempo atras caba. “Ta te awor boso ta anuncia e problema aki?” un usuario a cuestiona. “Ta for di siman pasa diamars cu mi tabata eynan tabata calor, ta manera un sauna.” Otro usuario a comenta cu el a nota e problema di calor “ora mi tabata luna pasa kiden.”
Sinembargo, tur usuario a expresa nan bon deseo pa dialuna e pashentnan principalmente por haya alivio y e situacion keda resolvi pronto.
