ORANJESTAD – Actualmente e ‘kill cage’ ta cera. E hecho aki, cu ta uno transitorio, a crea un reaccion positivo cerca organisacion pro defensa y defensor di bestia.

Health promotion di DVG, Jurette Croes, a bisa cu e decision aki ta uno temporal y no permanente. Den un comunicado cu nan a divulga den prensa, berdad nan a informa cu nan ta bay cera e ‘kill cage’. Pero e ta aclaria cu e nan a dicidi pa cer’e temporalmente pa motibo di construccion cu ta tumando luga den nan edificio na Wayaca. E ta trabou aki ta bay dura dos siman.

Actualmente, esun cu kier deshaci di un animal, por hib’e cerca un organisacion cu ta busca adopcion pa e bestianan. E por tuma nota cu riba Facebook tin hopi bestia cu comunidad ta poniendo constantemente. E ta haya cu esaki ta un indicacion cu hopi hende no ta sterilisa nan mascotanan. Nan ta keda reproduci, y na momento cu no tin un demanda grandi pa adopcion, e bestianan ta keda riba caya. Nan ta keda sufri, of nan ta keda ocasiona accidente, te hasta deportistanan ta wordo mordi. Tur esakinan ta wordo ocasiona pa e problematica di cachonan cayehero.

E problema aki riba caminda y sitio publico ta birando grandi, a pesar cu ta existi e Ley di Cacho pa evita y controla, te hasta duna boet of castigo di prizon, pa esun cu no ta cumpli cu e ley aki.

Di otro banda, tin hende cu no ta hiba e bestia na e ‘kill cage’ sino cu nan ta laga e bestianan aki riba caya. Nan ta hayando hopi yamada for di bario di Wayaca mes, caminda tin hopi keho cu e hendenan ta bay saca e bestia y laga nan los den e bario. Croes a bisa cu DVG ta consciente cu esaki ta un problematica grandi, y nan ta desea cu tur e bestianan aki por wordo adopta. Pero e realidad ta cu tin haci hopi bestia riba caya.

Nan ta bay renoba e luga unda e ‘kill cage’ ta funciona y e lo haya un dak. E motibo ta cu den pasado, nunca nan por cera e ‘kill cage’. A yega di pasa cu e hendenan ta tira e bestianan cu nan kier deshaci di dje, over di e cura pa e cay paden di e cura di e ‘kill cage’. P’esey nan a dicidi lag’e habri 24 ora pa dia.

Pero e biaha aki, nan a dicidi di cer’e pa medio di un dak. Tambe nan ta bay introduci un orario di servicio for di 7:30am pa 12or merdia, caminda e persona por trece e animal cu nan no kier mas. Of cu nan no por logra haya un doño responsabel pa adopta su animal prome cu e ta dicidi di hib’e pa e ‘kill cage’.

Maneho
Den e orario cu lo keda introduci, e persona por trece e bestia den oranan di mainta, y e organisacionnan cu kier busca adopcion pa nan, tambe por bin den e parti di mainta.

For di 1or di merdia padilanti, e bestianan cu no a wordo adopta pa un doño responsabel, lamentablemente lo wordo sacrifica. E tempo cu nan ta duna e animal pa haya e chens di haya un doño y un chens pa salba su bida ta hopi cortico. Jurette Croes a splica cu e echo cu nan por larga e posibilidad aki ta demanda hopi planificacion y percura pa e cuminda di e bestianan.

E no sa si den e maneho nobo e cambio aki ta wordo introduci, pero pa loke e por compronde, esaki no lo ta e caso. E bestia lo keda maximo 6 ora den e sitio bou sombra, y nan lo haya cuminda cu awa. Pero despues di merdia, e bestianan cu no a wordo adopta lo haya eutanasia.

Pa esun interesa pa adopta un di e bestianan aki, tur parti mainta esun interesa por bin busk’e di dialuna pa diabierna for di 7:30am te cu 12or merdia.