Por anticipa cu den e tempo nos dilanti lo tin un confrontacion bastante fuerte entre gobierno y e sindicatonan cu ta representa empleado publico, pero unda no ta e reduccion continua riba tur salario lo ta e tema mas importante. Manera a anuncia den e ultimo version di e Uitvoeringsagenda, e plan ta existi pa trece reforma den e capitulo 9 di LMA, cu ta encera e reglanan pa supension y retiro di ambtenaar. Pa promer biaha den hopi aña lo ta bay tin cambio den e ley, aunke na e momento aki no ta conoci con fuerte e cambionan ey lo ta. Mester bisa cu nan ta cuadra cu loke tabata tende den ‘wandelgangen’ di funcionarionan Hulandes, cu lo mester ta preocupa cu e caminda largo cu ta tuma pa yega finalmente na kita un ambtenaar na Aruba di trabao. Y nan ta pensando y actuando for di nan cuadro di referencia Hulandes, unda den tur trayecto ta mas facil pa saca hende for di aparato publico. Mester bisa si cu mayoria di ambtenaar cu ta perde nan trabao na Hulanda ta caso di retiro relaciona cu reorganisacion di un departamento o ministerio. Contrario na nos modelo di goberna cu ta percura solamente pa yena mas hende den e aparato, aya regularmente ta tuma lugar restructuracion di trabao, unda tin vez tin funcion cu ta desaparece y cada funcionario mester solicita riba e funcionnan disponible. Esun cu no haya lugar, ta bay cas…

Mirando e realidad aki, ta di comprende cu ta dificil pa nan imagina un situacion manera nos tin na Aruba, unda no tur departamento ta traha cu plan fiho di organisacion, y ta laga e posibilidad pa un mandatario yena e plan di organisacion manera e ta haya ta bon. Ademas, no den tur caso tin un proceso formal di evaluacion unda regularmente e empleado publico ta duna cuenta di kico e ta haci y con e ta funciona. Cos masha normal den cualkier compania di cierto tamaño, pero na gobierno e ‘evaluacion’ politico ta esun cu tin mas peso.

Banda di esaki ta bin otro realidad menos bunita. E Departamento di Recurso Humano absolutamente no ta capacita pa maneha nan tareanan, y tin e multiple kehonan for di den e aparato cu nan papelnan por tarda varios aña pa sali, si acaso nan logra sali. Den cualkier famia nos por tende ‘horror stories’di nan mal funcionamento, y e propio sindicatonan por comproba esaki, unda na mas cu un ocasion den nan consulta cu gobierno nan a trece dilanti e atraso enorme cu e departamento di Recurso Humano sa build up pa nan miembronan. E urgencia pa por tin funcionario capaz na trabao pa maneha por ehemplo e elaboracion di e cantidad grandi di ‘landsbesluit’ a yega na tal grado cu hasta a yega di busca empleadonan experimenta cu a bay cu pension caba, pa bolbe na pia di trabao. Esaki naturalmente ta un indicacion cu e organisacion no ta logra desaroya internamente e personanan cu mester acumula e conocimento necesario pa haci e trabao nada facil aki. Pues bon mira e departamento ta carece di suficiente base tanto den calidad como cantidad.

Pa bolbe un rato na e reglanan di LMA; ta importante pa señala cu awor caba ta existi den e ley e base legal pa retira ambtenaar a base di reorganisacion, unda por ehemplo nan funcion ta desaparece. Den e sentido ey no ta tanto e falta di e cuadro legal pa ehecuta reorganisacion y reduci e cantidad di ambtenaar, mas bien e voluntad politico ta hunga un papel importante. Den pasado, hasta den caso cu a haci algo cu por a pasa pa un reorganisacion bon structura, no a tuma e siguiente paso, retirando esnan cu no tabata pas mas den e organisacion. Cu consecuencia cu den e siguiente eleccion e gobierno nobo a elimina e trabao haci. E ambtenaarnan a keda, haciendo bon trabao o mal trabao, y realmente algun aña despues no a mira nada mas di e reorganisacion. E experiencianan aki no ta parce un bon fundamento pa bay cana e mesun proceso, a menos cu Hulanda impedi cu e politico di Aruba ta logra sabotea e proceso, atrobe.

Un bon caso pa nos comproba cu e biaha aki tin un proceso serio, ta e existencia di e ‘spiritunan’ den e aparato. Ta dificil pa kere cu den e confrontacion aña pasa tabata trata di existencia so di ‘spiritu’ di e ex-ministro di Planificacion y Desaroyo Teritorial. E ta un fenomeno general unda e propio mandatarionan ta permiti cu tin hende ta drumi na cas y ta cobra salario, unda hende normal mester lanta di nan cama y bay haci nan trabao. Esaki no ta solamente un falta di respet flagrante di e persona pa comunidad, pero e ta igualmente un falta di respet di e mandatario cu ta tolera y stimula esaki. Pa loke ta nan caso, e mesun ley di LMA ta duna awor caba e instrumentonan pa atende e e casonan aki. Pa cuminza mester comproba cuanto tempo nan no a traha, pa kita e salario ey di nan. Seguidamente, pasobra ta trata di caso structural di incumplimento, mester cuminza e proceso di retiro. Gobierno por duna e bon ehemplo cuminzando pone orden entre nan famia y amigonan. Credibilidad ta birando algo importante.

LEAVE A REPLY

Please enter your comment!
Please enter your name here