No tin un areglo ainda pa localnan cu ta vacuna na Merca of na otro pais y kier bolbe Aruba. Nan mester sigui paga pa e PCR test na aeropuerto. Pero tampoco pa turista vacuna. Un ciudadano completamente vacuna a experiencia esaki personalmente.

E ciudadano a tuma contacto cu Bon Dia Aruba, pa informa cu el a ricibi tur dos inyeccion di e vacuna di Pfizer na Merca, fin di Mei. E tabata na e pais ey pa motibonan medico y a ricibi su vacuna na Jackson Memorial Hospital. E ciudadano Arubiano a manda e copia di e carchi di vacuna pa su dokter di cas na Aruba y a contacta DVG pa pidi pa por pone e prueba di vacuna riba e Health App di Aruba, pa asina e por demostra, ora cu e bolbe Aruba cu e ta vacuna.

E empleado encarga na DVG a priminti esaki via e-mail, despues cu e ciudadano a splica cu e no kier haya problema ya cu e ta bay Merca regularmente pa haya tratamento medico. Dialuna ainda el a tuma contacto cu DVG pasobra e no por a mira nada riba su Health App. Coleganan na DVG a bisa cu e persona encarga lo yam’e pero te cu Dialuna atardi, e no a tende nada.

Locual a preocup’e ta e hecho cu un otro ciudadano local a bolbe Aruba for di Merca y a mustra na aeropuerto Reina Beatrix cu e tin tur dos inyeccion di Pfizer. Uno el a haya na Miami, y e otro inyeccion na Aruba. Sinembargo, a avisa e persona aki cu no ta acepta e pruebanan aki y como tal, e ta obliga pa paga pa un PCR test pa prueba cu e no tin COVID-19. “Tin hopi hende cu ta vacuna den exterior y ta residente di Aruba. E ta parce mi absurdo cu nos vacuna no ta conta. Nos no por bolbe haya e vacuna na Aruba, toch?” tabata e comentario haci na Bon Dia Aruba. “Y kico esey ta bisa di con Aruba ta evalua Center for Disease Control di Merca cu ta e instancia cu ta duna mi e prueba di vacuna for di e hospital? Y con e ta impacta e futuro di turismo di Aruba? Mi ta spera cu aki ta trata unicamente di un hende na aeropuerto cu no ta bon informa y a haci un fout. Pasobra di otro forma, e ta discriminacion,” e ciudadano a comenta na Bon Dia Aruba.

Redaccion a yama DVG henter mainta ayera, pero ningun hende a contesta e telefon. A tuma contacto e ora cu miembro di Crisis Team y alabes Director di Aruba Tourism Authority, Ronella Croes, kende a bisa cu e proceso pa reconoce residentenan cu a haya nan vacuna den exterior ainda ta den preparacion. “Nos ta trahando riba esaki. A manda proposicion pa aproba esaki,” Ronella Croes a bisa. “Dialuna a haci pregunta riba e procedura, cu entretanto ta cla. A entreg’e siman pasa pa aprobacion y nos ta wardando riba esaki. Basicamente awor nan no por drenta sin tin cu pasa e test. Pero unabes aproba e proceso, nan lo por y lo informa nan di kico nan mester haci pa registra y asina drenta sin tin cu haci e test. Pa turista vacuna tambe tin un procedura y nos ta trahando riba un maneho pa esaki tambe. Nos a avansa bastante riba e tereno aki y ta spera di por presenta un proposicion otro siman. ‘Step by step,’” Croes a bisa Bon Dia Aruba.

Den otro palabra, pa awor, un ciudadano local cu ta completamente vacuna, toch mester paga pa su PCR test ora di drenta Aruba, te ora cu anuncia e procedura nobo. Pa loke ta e contesta di DVG na e ciudadano? Unabes cu Bon Dia Aruba a tuma contacto cu Ronella Croes, un rato despues e ciudadano a haya yamada cu el a keda warda riba dje. E contesta tabata e mesun. Esta, cu no ta acepta e carchi di vacunacion di CDC pa awor, pero cu eventualmente esaki lo ta e caso. “Pero e ehecutivo di DVG a bisa mi cu no por bisa ki tempo esaki lo ta e caso.”

 

LEAVE A REPLY

Please enter your comment!
Please enter your name here