E programa di ciencia, tecnologia, ingenieria y matematica nobo na Universidad di Aruba ta cla pa cuminsa su prome aña na nivel Bachelor. E comision encarga cu implementacion di e proyecto a reuni pa monitor con ta bayendo den anticipacion di e start di e programa y tambe pa planifica riba renobacion di edificio pa e programa nobo otro aña.

Recientemente a tuma lugar e prome reunion di planificacion pa e proyecto di SISSTEM (Sustainable Island Solutions for Science, Technology, Engeneering and Math) cu lo inicia na september proximo na Universidad di Aruba. SISSTEM a wordo financia pa e 11 fondo di Desaroyo Europeo cu 13 miyon Euro.

Minister Ruiz-Maduro ta informa cu a forma un Steering Committee di SISSTEM cual su meta ta pa monitor e desaroyo di e proyecto y e fondonan cu Union Europeo a pone disponibel. E Steering Committee ta consisti di e siguiente personanan: David Akopyan UNDP Resident Representative, Sharifa Ali-Abdullah Assistant Resident Representative di United Nations Development Program (UNDP), Professor Buys, Professor Gielen y Karine Op de Beeck di Katholieke Universiteit (KU) Leuven di Belgica, Glenn Thode, Patrick Arens y Eric Mijts di Universidad di Aruba. Ademas gobierno tin como miembronan di e Steering Committee, e representantenan di Departamento di Asuntonan Economico (DEACI), Sra. Maria Dijkhoff-Pita Directora di DEACI y sra. Vivian Loopstok-Geerman Hoofd Afdeling Sustainable Development Planning na DEACI.

SISSTEM ta encera 2 parti: Bachelor y renobacion di edificio

E proyecto SISSTEM ta consisti di dos parti:

1. E programa academico cu ta wordo prepara den cooperacion cu KU Leuven y Universidad di Aruba. E parti aki a inicia y e prome aña di e ‘Bachelor Program’ ta cla pa cuminsa na september awor na Universidad di Aruba.

2. E parti di renovacion di Maria Convent patras di misa San Fransisco na Playa. E renovacion a wordo programa pa por cuminsa na aña 2020. Monumenten Bureau y DOW tambe lo ta envolvi cu e proyecto aki como cu e edificio di Maria Convent ta un edificio monumental. E parti di e proyecto aki ta inclui tambe laboratorionan modular, ekiponan pa laboratorio, muebles y IT. Parti B di e proyecto lo wordo maneha door di UNDP su oficina na Trinidad & Tobago.

E financiamento di e proyecto ta bini di Union Europeo y ta costa aproximadamente 25 miyon florin.

E representantenan di UNDP a usa e oportunidad cu nan ta na Aruba pa haci un bishita cerca Minister Presidente Sra. Evelyn Wever-Croes pa asina por a informe tocante di e desaroyo di e

proyecto di SISSTEM. Alabes a hiba combersacion riba e anvancenan y implementacion di e Comision di Sustainable Development Goals di Gobierno.

E mandatario ta subraya cu e proyecto SISSTEM ta pas den e programa di inovacion di Gabinete Wever-Croes y den e Maneho Economico 2019-2022. Ministro di Finansa, Asunto Economico y Cultura encarga cu e cartera di e fondonan Europeo ta sostene e proyecto di SISSTEM y ta sumamente contento cu e planificacion di e proyecto a inicia.