Programa di sterilisacion masal ta evita 49,000 animal di caya na Aruba den un aña, segun AWAA

Animal Welfare Alliance Aruba (AWAA) a anuncia cu su programa di sterilisacion masal a preveni alrededor di 49,000 cacho y pushi di nace den situacion di caya solamente den aña 2025. Esaki ta marca e aña mas impactante di e organisacion te awor.

Mientras accionnan di rescate ta sigui salbando bida tur dia, AWAA ta enfatisa cu rescate solamente no por resolve e crisis continuo di sobrepoblacion di animal na Aruba.

“No nos por rescata nos salida for di e problema di sobrepoblacion,” Mercedes de Bruyn, miembro di directiva, di AWAA ta bisa. “Rescate ta salbando bida awe, pero sterilisacion ta cambiando futuro.”

E cifra nan di sterilisacion di AWAA ta mustra un crecemento fuerte:

•2023: 1,500 animal sterilisa;

•2024: 2,700 animal sterilisa;

•2025: 4,687 animal sterilisa.

Esaki ta trece e total di animal sterilisa pa AWAA na 8,887.

Segun datonan di AWAA, e sterilisacionnan haci na 2025 solamente ya caba a preveni nacemento di

•28,000 cacho

•21,000 pushi

E cifranan aki ta representa decena di mil animal cu a wordo salba di un bida di hamber, malesa, negligencia, abandono, y sufrimento riba caya.

“Sterilisacion masal ta e unico manera proba pa baha e number di animal cu ta drenta den e sistema, alivia presion ariba rescatistanan, y proteha bienestar di animal na largo plaso,” segun AWAA. “Ora nos baha nacemento na e fuente, henter e sistema ta bira mas humano y sostenible.”

AWAA ta sigui traha hunto cu rescatista, boluntarionan, y miembronan di comunidad riba henter e isla, reconociendo cu mester di prevencion a demas di rescate, conscientisacion y educacion pa crea un cambio duradero.

AWAA ta expresa su gradicimento profundo na tur boluntario ariba y pafor di Aruba cu a contribui durante aña 2025 pa logra e resultado extraordinario aki. Nan amor, dedicacion y perseverancia pa bienestar di animal ta inmenso. Sin e compromiso di nos boluntarionan, e trabao di AWAA no lo ta posibel.

AWAA tambe ta gradici tur sponsornan cu a sostene nos trabao financieramente, alabes tur nos sponsornan di cuminda y e partnernan cu a contribui cu sponsoring di nos edificio. E apoyo financiero y logistico di nos sponsoronan ta esencial pa garantisa cu nos por sigui ofreciendo sterilisacion y cuido na e escala cu Aruba mester.

Hunto cu e apoyo di nos boluntario y sponsornan, AWAA ta creando un cambio real y duradero pa bienestar di pushinan y cachonan na Aruba.

Tocante Animal Welfare Alliance Aruba (AWAA)

Animal Welfare Alliance Aruba ta un organisacion sin fin di lucro dedica na reduccion di sufrimento di animal a traves di sterilisacion masal, educacion comunitario, y colaboracion cu partnernan di rescate. Mision di AWAA ta pa para e ciclo di sobrepoblacion y mehora calidad di bida di pushinan y cachonan na Aruba pa medio di solucionnan basa riba prevencion.