ORANJESTAD— Eric Mijts: “Loke nos ta faltando pa hopi decada na Aruba ta hende cu por studia na y pa Aruba den direccion di ciencia y tecnologia. Tin hopi hende cu ta bay, y si nan ta bon, companianan internacional ta bay cu nan. (SISSTEM) ta crea un oportunidad pa Aruba construi pa su mes.”

Maske e programa di Sustainable Island Solutions through Science, Technology, Engineering and Mathematics (SISTEM) na Universidad di Aruba lo ta habriendo su programa Bachelor cu un cantidad di studiante limita e aña aki, e trabou pa set up e programa ta extenso, y ta encera cooperacion cu otro universidadnan, pero tambe introduccion di facilidadnan nobo.

E aña aki Aruba ta conoce su prome programa riba tereno di ciencia, tecnologia, ingenieria y matematica na nivel universitario (WO), cual yama SISSTEM. Entrante proximo siman, Universidad di Aruba lo ta habri pa tuma studiantenan cu lo kier studia den e direccion aki. Eric Mijts, coordinador pa e lantamento di e proyecto SISSTEM, ta splica Bon Dia un poco tocante e proceso cu e apertura di e programa nobo aki a encamina.

15 pa 25 so den prome aña pero 70 studiante interesa
Pa e aña escolar venidero sr. Mijts ta premira cu e lo ta un ‘slow start’ cu 15 pa 25 studiante, mirando cu mayoria di studiantenan no ta bin na remarca inmediatamente, pasobra no ta cumpli cu e rekisitonan basico pa por haya admision na e programa. Segun sr. Mijts, tin 50 pa 70 studiante cu tin interes den e programa.

Admision inmediato ta bay na studiantenan cu a caba un estudio na nivel di VWO cu e exact pakket. Tambe pa studiantenan cu ta interesa y ta caba e Academic Foundation Year (AFY) cu e direccion di ciencia exacto, proximo aña nan lo por drenta e programa di 3 aña.

Pa studiantenan cu tin VWO, pero no tin ciencia exacto den nan pakket, nan lo por bin na remarca ainda pa drenta e programa despues di tuma curso adicional den zomer y examennan cu lo plania den futuro. Y finalmente, pa esunnan cu caba Havo of EPI cu ta interesa den SISSTEM, nan por sigui AFY pa un aña, pa ricibi admision na e programa nobo.

Programa
E programa di SISSTEM ta parti den 2: e prome lo ta basa riba un mescla general di ciencia manera kimica, fisica, matematica y ciencia geologico. “Esaki ta pa percura cu esunnan cu haya un diploma por ta flexibel pa loke e mundo di awe y futuro ta spera di nan.”

Pa e di dos parti di e programa, e studiante lo por scoge entre Information Science y Data Science, Bio-Environmental Science of Technology and Engineering. Ademas di experticio den un di e areanan menciona, parti di e programa lo ta enfoca riba traha un red internacional cu otro investigado y cientifico, mirando cu e ta encera field work y laboratory work na otro universidadnan rond mundo.

Demanda halto pa esunnan cu caba SISSTEM
Studiantenan cu caba e programa den Information & Data Science ademas segun sr. Mijts lo ta den ‘high demand’ y lo ta facil pa haya trabou, mirando cu gobierno di Aruba tin plannan cla pa transicion na eGovernment, ‘cual lo rekeri di cientificonan cu conocemento di data y mas cu djis un par’. “Den sector priva, departamento di impuesto y tur e directienan lo tin mester di cientifico di data. Nos plan ta pa provee pa e mercado aki, mirando cu globalmente tin necesidad pa hende cu e experticio aki.”

Set up canando ainda
E set up di e programanan di bachelor y master’s, mescos e progama di PHD, por a tuma luga danki na fondonan di Union Europeo, cual a duna 13.05 miyon Euro pa esaki, pero tambe cu KU Leuven su aporte, cual ta un universidad na nivel di WO cu un rating halto den Europa.

Aunke ya caba e programa di Bachelor lo tuma un cantidad limita di studiante, e trabou pa henter e programa den su totalidad lo ta canando ainda, cual ta inclui e programa di Master’s y tambe proyectonan di PHD. E programa di Master’s ta plania pa habri den september di 2021. Ademas mester converti e edificio banda di Universidad, e Maria Convent, tambe pa por fungi como laboratorio di e facultad.