Na januari ministerio di Enseñansa a duna di conoce e programa special educativo ‘My Kinderhouse Aruba’ crea pa Drs. Amoriza Gunnink na unda lo aplica varios filosofia educacional.

Bon Dia Aruba a puntra Gunnink con e proceso di e programa a sigui mirando e situacion inespera di Covid-19 a presenta na henter mundo, pa loke el a menciona cu efectivamente esaki a haya hopi desafio pa asina e proyecto lo por cuminsa na 100%.

Ta bale la pena pa recorda cu e programa curicular ‘My Kinderhose Aruba’ ta integra diferente filosofia y metodonan di e campo di educacion trempan como Montessori, Reggio, Piaget enfoca riba investigacionnan y educacion basa den arte.

E programa ta multilingual cu Ingles y Hulandes como idiomanan principal, tambe ta incorpora matematica asina como otro materianan cu musica y weganan den aire liber, tambe ta presenta den dos cohorte, un pa muchanan di dos pa tres aña y un les pa muchanan di 4 pa 5 aña.

Gunnink un Arubiano estableci na Canada cu experiencia den educacion infantil ta forma parti di e ekipo di colaboracion Fundacion Innovacion Campus pa Educacion na Aruba y asina trece innovacion curicular enfoca den e prome añanan di educacion escolar.

E programa aki lo funciona como un scol preescolar y lo ofrece diferente pedagogia di miho practica educacional pa e muchanan di e isla, tampoco lo no wordo sostene pa Gobierno, sino cu e ta bay ta priva.

Di loke ta trata e aña escolar nobo cu te ainda no por garantisa su comienso pa via di brote nobo di Covid-19 y cu esey lo keda dicidi den siman aki, Gunnink a bisa cu e inscripcion pa cu e programa aki ta sigui y cu e gruponan di muchanan ta chikito pa cu di e manera ey e protocolnan di salubridad por keda garantisa.

Pa personanan interesa den programa educacional aki por tuma contacto cu Facebook page Kinder House Aruba y solicita informacion di dje.