Pa por bira un instituto academico internacional, e ta rekeri hopi inversion den infrastructura y academia, y e enfoke di Universidad di Aruba ta pa bira e miho centro di educacion superior pa Aruba mes.

Bon Dia Aruba a tene un combersacion cu Rector Interino di Universidad di Aruba, Sue-Ann Lee den luz di e discusionnan particularmente na Merca, riba e futuro di universidadnan, cu ta hayando atencion politico entre otro pa nan curiculo. Aunke na Merca, e enfoke riba e poder di Gobierno riba futuro di universidadnan, realidad ta cu e tin impacto internacional. Hulanda cu tambe tin un populacion grandi di studiante internacional tambe a cuminsa pone margen na e cantidad, pero esaki mas bien ta pa motibo di logistica y falta di infrastructura (vivienda).Ya caba studiantenan internacional ta reevaluando nan escogencianan y ta mira con paisnan manera China, Reino Uni y otro ta cuminsa promocionnan pa atrae e studiantenan aki.

Durante e combersacion amplio, cu lo keda publica den algun edicion, a lanta e pregunta, si e desaroyo aki por presenta un posibilidad pa Universidad di Aruba crece den un institucion cu ta habri pa studiantenan internacional. Banco Mundial den pasado a indica cu e posibilidadnan di diversificacion economico pa Aruba ta limita, pero cu educacion superior por ta un posibilidad. Asina tambe a mira establecimento di e universidadnan pre-medico manera Xavier University School of Medicine.

Sinembargo, Aruba tin su propio instituto di educacion superior, cu ta Universidad di Aruba cu tin e proposito pa sirbi comunidad di Aruba y esey ta keda su enfoke, segun Lee. UA tin e meta pa brinda personanan cu conocemento pa sirbi e necesidadnan di mercado di Aruba. “E gastonan pa studia na Aruba ta mas abou, y e profesionalnan aki generalmente ta keda Aruba. Universidad tin hopi contacto cu mercado na Aruba.”

Locual si a tuma nota cu tin interes di afo, particularmente di region manera Corsou, Boneiro, St. Maarten pa studia na Aruba, no solamente como studiante di intercambio, pero como uno ‘full time,’ y aki ta unda tin reto di infrastructura. “E problema ta keda vivienda pa e studiantenan.” (red. Na e momentonan aki FCCA ta den fase hopi adelanta pa un edificio pa studiantenan, na e oficina anterior di Ministerio Publico na Playa.)

Di otro banda, UA no ta organisa ainda pa brinda programanan cu ta dirigi na studiantenan internacional, por ehempel, no tin diferenciacion specifico den prijs pa un studiante di Aruba of uno di afo. “Nos ta haya studiante por ehempel di Venezuela y Colombia cu por keda cataloga como internacional, pero e no ta sosode hopi. Y mester tene na cuenta cu nos programanan ta na Ingles y otro na Hulandes cu ta haci e dinamica diferente.” Di otro banda, e posibilidad pa habri mas pa mercado internacional a bira mas serio na momento cu a cuminsa cu e facultad di ciencia SISSTEM, cu mester di un fluho di studiante pa garantisa su continuidad. “E idea ta pa amplia SISSTEM pa region y na mesun momento nos ta purbando si pa habri e otro programanan tambe pa region. “Pero e aspecto di ‘huisvesting’ ta keda un problema.” No ta e responsabilidad di UA pa inverti den vivienda di studiantenan y si kier crece, Gobierno mester ta riba e mesun liña, pa asina crea e facilidadnan.”

UA ta trahando si riba su plan strategico pa e siguiente 5 añanan pa mira cua ta e facilidadnan propio cu tin. Awor aki por conta adicionalmente cu Maria Convent. “E ta suficiente pa loke tin awor, cu ta cuater programa na nivel di Masters y siete programa di Bachelors, ademas di programanan den ora di anochi. Pues pa loke ta facilidad di espacio pa duna les, nos tin suficiente awor.” Pero si e cantidad di studiante local mes mester crece, e lo nifica presion riba e espacio actual, cu ta dificulta expansion di servicio. “Naturalmente si tin mas demanda, lo mester mira e ora ta con por amplia e facilidadnan of pa reorganisa con ta duna e lesnan.”Con cu bay bin, e ta nifica si cu si UA sigui crece den studiante mester tin inversion den tanto facilidad pero tambe den personal pa por responde na e demanda.

Na e momentonan aki UA ta pasando den un periodo di stabilidad den cantidad di studiante pa mayoria programa. “Pa tur e siete programanan di Bachelor’s tin como 20 studiante pa aňa. E estudio di derecho tin como 40 studiante. SISSTEM ta un poco menos, pero esey ta di spera ya cu ta e programa mas nobo.”

Como tal, UA ta premira si cu pa por sigui responde na mercado di Aruba y eventualmente na un demanda regional, lo mester mira e posibilidad pa crea su propio campus. No solamente pa acapara e cantidad di studiante, pero tambe pa traha riba capacidad di conocemento, cu ta inclui e area di investigacion cientifico. “Si kier bay e direccion ey, lo mester mira con por acomoda hende na e miho forma posibel,” tabata e observacion di Rector Interino Sue-Ann Lee.