Prohibicion di celular den scol ta ricibi reaccion mixto den tanto studiante como mayor

Varios scol na Aruba a cuminsa adopta e prohibicion di celular den oranan di scol y algun te hasta riba tereno di scol en general, implementando reglanan nobo unda e studiantenan no tin mag di hiba nan celular scol y den caso cu haci esaki, mester entrega e celular na administracion pa henter e dia escolar.

Esaki no ta un decision poco comun, mirando cu den otro paisnan tambe a bini cu decisionnan y reglanan similar pa atende e mesun problemanan aki cu actualmente ta presentando den e scolnan local.

Den un di e scolnan en cuestion, a comenta cu un di e motibonan pa e decision aki ta e efectonan negativo cu ta mirando di celular na scol, cual a cuminsa surpasa e efectonan positivo. Esaki ta e caso tambe den scolnan di exterior, unda tambe a tuma decisionnan similar pa motibo cu a mira cu uso di celular na scol ta afectando e habilidadnan social di e muchanan, nan concentracion y tambe ta dunando un impulso na bullying cibernetico den scolnan.

Na aña 2023 a tuma un decision similar na Hulanda, unda lo preveni cu muchanan lo por bay scol cu nan telefon den klas. Fuentenan cercano na e Gabinete a confirma cu scolnan lo a ricibi te cu dia 1 di october di e aña ey pa crea un strategia di con lo aregla e restriccion pa nan mes. Si esaki fracasa lo a fracasa, reglanan nacional tabata di ser introduci pa restringi e uso di telefon den scol.

Den cuadro di e prohibicion aki, e studiantenan mester a laga nan celular na cas of warda esaki na scol y segun otro lider escolar di Limburg, Annemarie Lukassen, esaki a funciona “bastante bon.” Algun scol manera Bouwens van der Boije College, a crea un sistema di sancion unda esnan cu ta den incumplimento repetidamente, ta ricibi un sancion manera un trabao pa haci.

Despues di apenas 1 aña desde cu e prohibicion a drenta den efecto na Hulanda su scolnan secundario, a nota un mehoracion significante. Segun e reportahenan, e studiantenan tabata mas social y menos distrai, segun Parool su reportahe despues di papia cu varios scol.

E tempo aki, un docente a comenta cu “anteriormente e studiantenan rapidamente tabata gara nan celular ora cu cos tabata keto den klas. Awo nan mester papia cu otro. Di e manera ey, e momento social t’ey back.” Otro testimonio a bini for di director di un lyceum, ken a reporta un cambio den comportamento, unda e studiantenan a cuminsa hunga wega di mesa of basketball cu otro y mas importante a cuminsa papia cu otro mas.

Algo notable tabata cu tambe a mira un disminucion den bullying despues di e prohibicion di telefon, cu un docente bisando cu e studiantenan no ta graba otro ni manda potret pa otro mas durante pauze. Tambe a mira un aumento den e studiantenan su habilidad di concentra pa motibo cu nan ta menos distrai y tin menos ansiedad di no mira loke tur e otronan ta mirando nline.

E exito di e prohibicion aki den exterior ta duna e impresion cu e ta uno util y efectivo pa mehora e prestacion di studiantenan na scol, cual ta algo cu docentenan y lidernan escolar semper ta busca y kier mira na scol. Tambe un factor di peso ta e disminucion den probabilidad di bullying, aunke esaki por ta e caso solamente na scol, mirando cu na momento di yega cas e bullying por sigui of tuma luga di manera cibernetico.

Algun studiante local a expresa cu, manera ta di spera, nan no ta di acuerdo cu e decision aki, mientras cu otronan ta considera cu esaki no lo haci un diferencia y otronan tabata di acuerdo cu e decision. Entre esnan cu no tabata di acuerdo, notable ta cu e motibonan no tabata di comunicacion cu e mayornan ni tampoco seguridad, sino e habilidad di por busca informacion online y haci uso di hermentnan digital pa completa nan tareanan.

Den e mayornan tabatin reaccion similar, cu algun di acuerdo, otronan di opinion cu esaki no ta haci un gran diferencia, y otronan cu no tabata di acuerdo cu esaki. Un di e motibonan mas grandi pa esaki ta, cu un di e motibonan principal pa e cual e uso di celular ta util pa e mayornan, ta e comunicacion di ora e mucha ta caba scol trempan of no y cualkier contratempo cu nan por experiencia ora di tin cu busca nan.

Den un di e scolnan local, e regla cu lo implementa ta cu studiantenan no ta permiti hiba e celular scol, y den caso cu haci esaki e mester ta marca cu e nomber di e studiante tur dia, lo pone esaki na directie den un caha y na final di dia e studiante por busca esaki back. Algo cu a menciona, ta cu si e mayornan mester laga un mensahe na e studiante, a provee e number di administracion pa por haci esaki, mientras cu tambe a pidi e mayornan pa revisa e sistema di LVS tur dia pa asina por wak ki klas ta caba ki ora y si e studiante lo caba trempan.

Parti di e problema den e parti aki di e prohibicion, ta den e mayornan cu no tin e posibilidad di mira e sistema aki online a causa di orarionan di trabao cu ta coincidi cu e orario escolar, y cualkier actualisacion tocante e dia escolar di e studiante lo ta dificil di por mira, manera un mayor a splica “si mi yiu no por yega na mi paso mi ta na trabou, e por yega na su tata of famia cu ta busk’e ora cu mi no por. Awo nan tambe tin cu bay keda pendiente di LVS pa por haya sa ora e ta caba trempan? Nan por bisa cu e por yama na directie, pero di tanto mucha cu awo tin cu haci uso di e mesun telefon na directie, ta cuanto e mester bay warda pa por sikiera informa cu el a caba scol?” E preocupacion aki ta comparti cu mayornan ken su yiu ta haci uso di transport pa por yega cas, expresando cu “awo mi tin cu pidi e señora di transport check LVS pa sa ki ora mi yiu ta caba scol? Mi ta haya cu e parti aki no tin hopi sentido ni consideracion cu e mayornan.”

Loke ta keda awo ta mira ki resultado e prohibicion aki na nos scolnan local lo duna, y si berdaderamente esaki lo tin e impacto cu e lidernan escolar ta busca. Talbes un punto di partida por ta di involucra e mayornan den e creacion di e strategianan y alternativanan, mirando cu un di e preocupacionnan principal ta e peso cu lo cay riba e mayornan cu posiblemente no tin e habilidad di por carga cu esaki a causa di otro responsabilidadnan.

E prioridad ta keda e bienestar di e muchanan y e creacion di un espacio unda nan ta lo miho ekipa posible pa por mira bon resultado den e area academico di nan desaroyo, y talbes esaki ta un di e prome pasonan den e direccion aki.